Մարդու լյարդի կողմից կոֆեինի մշակման արագությունը կարգավորվում է հատուկ CYP1A2 գենով: Մարդիկ, ովքեր դրա պակասն ունեն, կարող են վատ ինքնազգացողություն ունենալ և անքնություն զգալ կոֆեին պարունակող ըմպելիքներ օգտագործելուց հետո: Այս մասին հայտնում է Daily Mail-ը՝ հղում անելով Օքսֆորդի Բրուքսի համալսարանի գիտնականների հետազոտությանը։
Հետազոտողների կարծիքով՝ սուրճի նկատմամբ տարբեր ռեակցիաները գենետիկորեն են պայմանավորված։ Կոֆեինը կարող է մնալ մարմնում 90 րոպեից մինչև ինը ժամ՝ կախված նրանից, թե որքան արագ է լյարդը քայքայում այն։
Կոֆեինի մշակման և օրգանիզմից դուրս գալու արագությունը կարգավորվում է CYP1A2 գենով: Բնակչության մոտ կեսն ունի CYP1A2-ի երկու օրինակ: Սա նշանակում է, որ կրկնակի գենի կրողները արագ և անվտանգ են նյութափոխանակում կոֆեինը: Տասը մարդկանցից չորսն իրենց գենոմում ունեն գենի միայն մեկ օրինակ, ինչի պատճառով էլ սուրճն ավելի երկար է մնում նրանց օրգանիզմում։
Մոտավորապես յուրաքանչյուր տասներորդ մարդու մոտ բացակայում է CYP1A2 գենը: Նման մարդիկ կարող են քայքայել կոֆեինը, բայց դա նրանց համար շատ ավելի դժվար է։ Վերամշակման նվազեցված արագությունը թույլ է տալիս խթանիչին շատ ավելի երկար մնալ արյան մեջ, ինչը մեծացնում է քնի կորստի վտանգը:
Որոշ ուսումնասիրություններ ցույց են տվել նաև, որ CYP1A2-ի պակաս ունեցող մարդկանց մոտ սուրճ խմելու հետևանքով արյան ճնշման և սրտի զարկերի զգալի աճ կարող է առաջանալ: Միևնույն ժամանակ, ոմանք կարող են զգալ ուժի ակնթարթային աճ, իսկ մյուսների մոտ նկատվում են միայն անցանկալի ախտանիշներ (նյարդայնություն, առիթմիա):
