Երևանցիներն արդեն մեկ ամսից ավելի բողոքում են հասարակական տրանսպորտի հետ կապված «նորություններից»՝ տոմսի համար վճարել QR code-երով, միայն 100 դրամանոցներով, արդեն նաև բանկային քարտերով։
Ուղևորների դժգոհությունը դեռ չմարած, այսօր արդեն ավտոբուսների վարորդներն են գործադուլ անում և դուրս չեն եկել երթուղիներ։ Նրանց բողոքի պատճառն այլ է՝ աշխատանքային պայմաններ ու աշխատավարձային քաղաքականություն։
«Շատ ճիշտ են անում, որ բողոքում են»,- Panorama.am-ի հարցման ժամանակ ասաց քաղաքացիներից մեկը։ Մյուսն էլ այն կարծիքի է, որ մարդիկ չեն կարողանում ապրել այն աշխատավարձով, որ ստանում են, այդ իսկ պատճառով էլ բողոքում են։
«Շատ նյարդային է վարորդների աշխատանքը։ Ամեն ուղևոր մի ձև է արտահայտվում, տարբեր բաներ են խոսում վարորդների մասին։ Ոնց որ վարորդն է մեղավոր, որ թանկանալու է տոմսը կամ 100 դրամներ են պահանջում։
Շատ դժգոհ ենք կառավարությունից, ոչ վարորդներից։ Վարորդներն իրենց գործն անում են»,- նշեց քաղաքացին։
«Ժողովրդի մասին չեն մտածում։ Ժողովուրդը լրիվ անտեսված է՝ թե մեծերը, թե երիտասարդները, ողջ Հայաստանն է անտեսված։ Պետք է մտածել ժողովրդի մասին, ոչ թե իրենց գրպանի»,- ասաց քաղաքացին։
«Ի շահ, ի օգուտ իշխանությունների է արվում ամեն ինչ»,- համոզված է քաղաքացին։
Քաղաքացիները նշեցին, որ արդեն խուսափում են տրանսպորտից օգտվելուց, քանի որ բավականին դժվարացել է այս փոփոխություններից հետո օգտվելը։ Իսկ եթե թանկանա, ընդհանրապես կխուսափեն տրանսպորտ նստելոց։
«Եթե 100 դրամանոց չես կարողանում ճարել, պետք է չնստես ավտոբուս։ Դա ինչի՞ է նման»,- ասաց քաղաքացին։
«Եթե թանկանա, էլ տրանսպորտ չենք նստի»,- նշեց մեկ այլ քաղաքացի։
Մանրամասն՝ տեսանյութում։
