Փետրվարի 4-ին «Օթեւան » կազմակերպությունից այցելել էին Արարատի մարզի Դարբնիկ համայնքում գտնվող հանրակացարանի բնակիչներին, ասել, որ մեկ տարով պայմանագիր պետք է կնքեն: Չկնքելու դեպքում պարտավորեցրել են 48 ժամվա ընթացքում հեռանալ այդ բնակարաններից, կնքելու դեպքում էլ երաշխիք չէին տվել, որ մեկ տարի անց կապրեն այնտեղ: Բնակիչները հայտնվել էին լարված իրավիճակում, ահազանգել տարբեր ԶԼՄ-ների, այդ թվում նաեւ` Lragrogh.com-ին:
Պարզաբանման համար դիմել էինք ՀՀ աշխատանքի եւ սոցիալական հարցերի նախարարություն:
Պատասխանը ներկայացնում ենք ստորեւ:
«Ի պատասխան Ձեր 10.02 . 2026թ. գրության` տեղեկացնում ենք, որ Աշխատանքի եւ սոցիալական հարցերի նախարարության «Օթեւան » ՊՈԱԿ-ի Մասիս խոշորացված համայնքի Դարբնիկ բնակավայրում գտնվող սոցիալական բնակֆոնդում բնակվող որեւէ ընտանիքի բնակարանից դուրս գալու պահանջ չի ներկայացվել:
Տվյալ ընտանիքներին առաջարկված նոր պայմանագրերի կնքումը պայմանավորված է բացառապես իրավական փոփոխություններով: Մասնավորապես` ՀՀ կառավարության 2025թ. նոյեմբերի 20-ի «Հանրակացարաններ » ՊՈԱԿ-ը լուծարելու, անշարժ գույքն անհատույց, անժամկետ օգտագործման տրամադրելու, անշարժ գույքը հետ վերցնելու եւ ամրացնելու մասին » N 1659-Ա որոշմամբ` 2026թ. փետրվարի 1-ից լուծարվել է Աշխատանքի եւ սոցիալական հարցերի նախարարության «Հանրակացարաններ » ՊՈԱԿ-ը եւ անհատույց, անժամկետ օգտագործման իրավունքով տրամադրվել է «Օթեւան » պետական ոչ առեւտրային կազմակերպությանը` որպես պետական սոցիալական բնակարանային ֆոնդ օգտագործելու նպատակով: Հետեւաբար, անհրաժեշտություն է առաջացել ծառայությունների հետագա մատուցումը կազմակերպել ԱՍՀ նախարարության որդեգրած քաղաքականության եւ ՀՀ օրենսդրության պահանջներին համապատասխան»:
