Հունիսի 18-ին Ամերիկայի Միացյալ Նահանգներն ու Իրանի Իսլամական Հանրապետությունը ստորագրեցին 14 կետից բաղկացած փոխըմբռնման հուշագիր, համաձայն որի` կողմերը պարտավորվեցին բոլոր ճակատներում, այդ թվում` Լիբանանում, անհապաղ դադարեցնել ռազմական գործողությունները, չսկսել որեւէ պատերազմ կամ որեւէ ռազմական գործողություն միմյանց դեմ, զերծ մնալ միմյանց դեմ ուժի սպառնալիքից կամ դրա կիրառումից, ինչպես նաեւ ապահովել Լիբանանի տարածքային ամբողջականությունն ու ինքնիշխանությունը:
Իրանագետ Էմմա Բեգիջանյանը lragrogh.com-ի հետ զրույցում նշեց, որ հուշագիրն անհրաժեշտ էր երկու կողմերին, ավելի շատ` ԱՄՆ նախագահ Դոնալդ Թրամփին, քանի որ շուտով Կոնգրեսի միջանկյալ ընտրություններն են, նաեւ ` Ֆուտբոլի աշխարհի միջազգային առաջնությունն էր, որը լրջորեն ազդում էր համաշխարհային տնտեսության անկման վրա, ԱՄՆ-ի շահերից ելնելով դա պետք է կանխվեր:
« Գլոբալ առումով Իրանը հաղթել է, որովհետեւ ո’չ ԱՄՆ-ն, ո’չ Իսրայելը չհասան իրենց նպատակին: Իհարկե, պատերազմի նախաձեռնողը եւ նպատակամղված կողմն Իսրայելն էր, որը կարողացավ այն ժամանակ, երբ ԱՄՆ-Իրան բանակցությունները բավականին լուրջ ձեռքբերումներ ունեին, ԱՄՆ-ին համոզել, որ կարելի է պատերազմը չորս օրվա ընթացքում ավարտել: Նա համոզված էր, որ շուրջ 45 ռազմաքաղաքական առաջնորդների վերացնելով` Իրանում կարելի է հասնել իշխանափոխության, եւ կգա Բենիամին Նեթանյահուի սրտի իշխանությունը` նախկին թագաժառանգը, որը հլու-հնազանդ է Նեթանյահուին: Իրանն ահռելի նյութական վնասներ էր կրել, տնտեսությունը բավականին ծանր վիճակում էր, եւ իրեն անհրաժեշտ էր այդ հուշագիրը: Այդ պատճառով էլ Պակիստանի միջնորդությամբ կողմերը համաձայնության եկան: Սակայն Իսրայելը դեմ է դրան: Եթե 60 օրում չհասնեն արդյունքի, կարող են դա երկարաձգել, բայց Նեթանյահուն կարող է քայլ անել եւ զրոյացնել արդյունքները: Դրանք շատ փխրուն բանակցություններ են, տարբեր ելեւեջներ ունեն: Այսօր կարող է Թրամփը հայտարարել, որ առաջընթաց ենք գրանցել, իսկ վաղը կարող է հայտարարել, որ վերացնելու ենք իրանական քաղաքակրթությունը »,- կարծում է Էմմա Բեգիջանյանը:
