ՀՀ Ազգային ժողովի նախկին նախագահ Տիգրան Թորոսյանը, որը Արցախի հարցով տարբեր ԶԼՄ-ների հարցազրույցներ տալիս ներկայանում է որպես քաղաքագիտության դոկտոր, մի առիթով Ֆրանսիայի նախագահ Էմանուել Մակրոնի մասին հայտարարել է. «Մակրոնն իրեն պահել էր խուլիգանի նման, միայն խուլիգանները կարող են գնալ ուրիշ երկիր եւ կոպտորեն միջամտել նախընտրական գործընթացներին: Այլանդակություն էր, երբ Մակրոնը Շառլ Միշելի հետ Բրյուսելում Հայաստանի ներկայիս ղեկավարին համոզեցին, դրդեցին մեջտեղ բերելու Ալմա Աթայի անհեթեթ հռչակագիրը, որի հիման վրա էլ Արցախը ճանաչեցին Ադրբեջան եւ վերջ»: Որ տասնամյակներ շարունակ Արցախի հարցով պարազիտացած քաղգործիչներ են եղել, եւ նրանցից մեկն էլ Տիգրան Թորոսյանն է, ոչ մեկի համար նորություն չէ: Մարդը տարիներ շարունակ իշխող կուսակցության` ՀՀԿ-ի անդամ էր, Հոկտեմբերի 27-ից հետո դարձավ ԱԺ փոխնախագահ, ավելի ուշ` ԱԺ նախագահ: Թե իր պաշտոնավարման շրջանում ինչ է արել Արցախի խնդրի խաղաղ կարգավորման համար` պատմությունը լռում է, որովհետեւ հլու-հնազանդ ծառայում էր Ռոբերտ Քոչարյանին:
2008թ. մարտի 2-ին Ազգային ժողովի հատուկ նիստում, լինելով ԱԺ նախագահ, Տիգրան Թորոսյանը հավանության է արժանացրել ՀՀ երկրորդ նախագահ Ռոբերտ Քոչարյանի հրամանագիրը, որով նա 20 օր ժամկետով հայտարարել էր արտակարգ դրություն: Ըստ այդ հրամանագրի` ԶԼՄ-ները պետական եւ ներքաղաքական հարցերի առնչությամբ կարող էին տեղեկատվություն տրամադրել բացառապես պետական մարմինների կողմից տրամադրվող պաշտոնական տեղեկատվության սահմաններում: Հենց այդ պատճառով էլ այն ժամանակ մի շարք ընդդիմադիր եւ չեզոք թերթեր 20 օր լույս չտեսան:
Մարտի 1-ի ողբերգական դեպքերից ամիսներ անց, երբ արդեն Սերժ Սարգսյանն էր ՀՀ նախագահը, Տիգրան Թորոսյանը հրաժեշտ տվեց իր պաշտոնին: Սակայն ոչ ամենեւին էլ իր սկզբունքայնության պատճառով: Պարզապես «մավրն արել էր իր գործը, մավրը պետք է հեռանար »: Իսկ այսօր Տիգրան Թորոսյանը արդար կվարվի, եթե խոսի, թե ինքն իր պաշտոնավարման շրջանում ինչ ներդրում է ունեցել, ինչպես է մեր երկիրը հասցրել այն օրի, որ Մակրոնն ու Շառլ Միշելը զերծ չեն մնում մեր ներքին գործերին միջամտելուց: Իսկ թե Ռոբերտ Քոչարյանի եւ ՀՀԿ-ի իշխանավարման տարիներին ովքեր եւ ինչպես էին միջամտում Հայաստանի ներքին գործերին` այլեւս ոչ մեկի համար գաղտնիք չէ:
Թագուհի Հակոբյան
