«Երևանի 9 գետնանցումներում և Թաիրովի փողոցից Հաղթանակի կամուրջ տանող ճանապարհին վերելակների տեղադրումն ընթացքի մեջ է: Փակ շուկայի և Կամոյի դպրոցի հարևանությամբ վերելակներն արդեն իսկ տեղադրված են: Վերջինս փորձարկված է և մոտ օրերս կհանձնվի շահագործման»:
Այդ մասին Երևանի գործակարգավարական խորհրդակցության ժամանակ հայտարարեց Երևանի քաղաքապետարանի շինարարության և բարեկարգման վարչության պետի պաշտոնակատար Տիգրան Գեղամյանը:
«Այսօր սկսվում են Փակ շուկայի հարևանությամբ գտնվող գետնանցումում վերելակների տեղադրման աշխատանքները: Միաժամանակ վերելակներ տեղադրելու նախապատրաստական աշխատանքներ են ընթանում հետևյալ հասցեներում՝ Կիլիկիա ավտոկայանի հարևանությամբ գտնվող գետնանցում, Գարեգին Նժդեհի փողոց՝ վարչական շենքի, ադմինիստրատիվ շենքի հարևանությամբ գտնվող գետնանցում, և «Հաղթանակ» զբոսայգու հարևանությամբ գտնվող գետնանցում»,- ասաց Տիգրան Գեղամյանը:
Երևանի քաղաքապետ Տիգրան Ավինյանը արձագանքելով հարցրեց՝ տեղադրվածներն աշխատո՞ւմ են:
Գեղամյանն արձագանքեց՝ Փակ շուկայի հարևանությամբ եղել են մի քանի անգամ անսարքություններ, որոնք 1 օրվա կտրվածքով վերականգնվել են:
«Դեպք է եղել, որ ֆիզիկապես վնասել են, դեպք է եղել՝ ոչ ճիշտ օգտագործման կանոններով օգտագործելուց կանգնել է վերելակը, բայց շտկել են արդեն»,- ասաց Գեղամյանը, և հավելեց, որ տեղադրվել են նաև տեսահսկման սարքեր, որոնք սպասարկող ընկերության տրամադրության տակ են:
Ավինյանն առաջարկեց երկարաժամկետ լուծում գտնել, որպեսզի սպասարկման ժամկետն անցնելուց հետո վերելակները կրկին սպասարկվեն. «Մինիմալ լուծումն այն է, որ մենք ուղղակի պատվիրակենք որևէ մեկին ծառայություն մատուցել մեզ, տեսանկարահանող սարքավորումներ դնել և պատասխանատվությունը դնել այդ ընկերության վրա: Դա, կարծում եմ, ամենամատչելի տարբերակը կլինի»:
