Երևանի քաղաքապետի համապատասխան որոշումներով՝ անօրինական տիրապետումից ազատվելու են համայնքային սեփականություն հանդիսացող հողամասերը և դրանցում առկա անօրինական շինությունները:
Այս մասին տեղեկացնում է քաղաքապետի մամուլի խոսնակ Հայկ Կոստանյանը։
«Նոր Նորք վարչական շրջանի Լվովյան փողոցի մի քանի հասցեներում հասարակական նշանակության կանաչ տարածքներում, համայնքային սեփականություն հանդիսացող հողամասի վրա կառուցվել են անօրինական շինություններ, որոնցով ծանրաբեռնվել է համայնքային սեփականություն հանդիսացող հողամասերը»,- «Ֆեյսբուք»-ի իր էջում գրել է Կոստանյանը։
Նշենք, որ լարված իրավիճակ է ստեղծվել Լվովյան փողոցում: Բնակիչներն ասում են, որ այնտեղ բնակվում են արդեն տաս տարուց ավելի և չունեն այլ բնակատեղի՝ տեղափոխվելու համար:
