Crocus City Hall-ում տեղի ունեցած ահաբեկչության զոհերի թիվը աճել է՝ հասնելով 137-ի։
Այս մասին ՏԱՍՍ-ին հայտնել է ՌԴ քննչական կոմիտեի մամուլի ծառայությունը։
«Մահացածների մարմինների նույնականացումը շարունակվում է։ Այս պահի դրությամբ ահաբեկչության վայրում հայտնաբերվել է 137 մարդու դի, որից երեքը երեխաներ են։ Հանցագործության վայրի զննությունը շարունակվում է։ Մինչ օրս հաջողվել է բացահայտել 62 մարմնի ինքնություն»,- ասված է հաղորդագրությունում։
Մարտի 22-ին ահաբեկչություն էր տեղի ունեցել Մոսկվայի Crocus City Hall-ում։ Ինքնաձիգով զինված անձինք, համերգից առաջ, ներխուժել էին համերգասրահ և անկանոն կրակահերթեր արձակել մարդկանց ուղղությամբ։
ՌԴ բուժհաստատություններում է գտնվում 107 տուժած։ Ծայրահեղ ծանր վիճակում գտնվողների թվում է մեկ երեխա։ ՌԴ նախագահ Վլադիմիր Պուտինը հայտարարել է Crocus City Hall-ում տեղի ունեցած ահաբեկչության բոլոր մեղավորներին կալանավորելու մասին։
Ընդհանուր առմամբ կալանավորվել է ահաբեկչության հետ առնչություն ունեցող 11 մարդ, այդ թվում՝ 4 կատարողները:
Ռուսաստանի նախագահի հրամանագրով մարտի 24-ը հայտարարվել է համազգային սգո օր:
