Սեպտեմբերի 25-ին Եգիպտոսում ՀՀ դեսպան Հրաչյա Փոլադյանին դիվանագիտական առաքելությունն ավարտելու կապակցությամբ հրաժեշտ տալու նպատակով ՀՀ դեսպանություն են այցելել Եգիպտոսի Հայ Կաթողիկե համայնքի առաջնորդ Գերապայծառ Տ․ Գրիգոր Օգոստինոս Գուսանը և համայնքի այլ ներկայացուցիչներ։
Ինչպես փոխանցել են դեսպանությունից, Տ․ Գուսանը, դեսպան Փոլադյանին շնորհակալություն հայտնելով պաշտոնավարման ընթացքում հայ-եգիպտական հարաբերությունների զարգացման ուղղությամբ կատարած հսկայածավալ աշխատանքի համար, նրան է փոխանցել Տանն Կիլիկիո Կաթողիկե Հայոց 21-րդ Կաթողիկոս-Պատրիարք Ռաֆայել Պետրոսի կողմից դեսպան Փոլադյանին շնորհված «Ս․ Ներսես Շնորհալի, 850 ամյակ հավերժության» շքանշանը՝ մաղթելով նորանոր հաջողություններ հետագա գործունեության մեջ։
Դեսպան Փոլադյանն, իր հերթին շնորհակալություն է հայտնելԳերապայծառ Հորը և Հայ Կաթողիկե համայնքին՝ Կահիրեում ՀՀ դեսպանությանը, ինչպես նաև իր ընտանիքին այս տարիների ընթացքում ցուցաբերած օժանդակության և արդյունավետ համագործակցության համար։
Նույն օրը երեկոյան Կահիրեի Սուրբ Թերեզ եկեղեցու ընդունելությունների սրահում տեղի է ունեցել հրաժեշտի ընթրիք։
