Երևանի ավագանու «Քաղաքացիական պայմանագիր» խմբակցության անդամ Միքայել Խաչատրյանը «Ֆեյսբուք»ի իր էջում՝ անդրադառնալով հասարակակական տրանսպորտի վարորդների գործադուլին, գրել է․
«Ակնհայտ է, որ Երևանի ավտոբուսների վարորդների «կողքից գումար» ասվածը, ստվերը վերացել է և նրանք բոյկոտում են հենց այդ պատճառով, դրա փոխարեն նրանք չեն բարձրաձայնում Երևանի քաղաքապետարանի կողմից սահմանված 15-օրյա բարձր աշխատավարձերի մասին։
Երևանի քաղաքային իշխանությունը այս անգամ չի գնալու ոչ մի կոմպրոմիսի, սադրանքի և բոլոր կազմակերպիչները հեռացվելու են աշխատանքից, առաջինը երևանցուն դուրս գալու համար»:
Հիշեցնենք՝ «Երևանի ավտոբուս» ՓԲԸ-ում վաղ առավոտից գործադուլ էր: Վարորդներից մի քանիսը հայտնել էին, որ աշխատանքային պայմանների բարելավում ու աշխատավարձերի բարձրացում են պահանջում։
Երևանի քաղաքապետարանի մամուլի քարտուղար Հայկ Կոստանյանն արձագանքել է առավոտից ավտոբուսների վարորդների կազմակերպած գործադուլին և նշել՝ որքան աշխատավարձ են ստանում նրանք:
Երևանի քաղաքապետ Տիգրան Ավինյանը ևս անդրադարձել է հասարակական տրանսպորտի վարորդների գործադուլին՝ նշելով, որ կազմակերպիչները ենթարկվելու են խիստ պատասխանատվության, որևէ տեսակի շանտաժի չեն տրվելու, կոմպրոմիսի չեն գնալու։
Հասարակական տրանսպորտի վարորդների կողմից այսօր իրականացված գործադուլի հետևանքով 18 վարորդ ազատվել է աշխատանքից։
