Երեւանի Շիրակի 49 հասցեի բնակիչ Անուշ Զաքարյանն իր որդու եւ չորս փոքր թոռնիկների հետ հայտնվել է ծանր վիճակում: Տնակը, որտեղ ապրում են, լցվել է կոյուղաջրով:
<Երեկ, երբ աշխատանքից տուն եկա, մանկապարտեզից վերցրեցի երեխաներին, ջուրը լցվել էր տուն: Դուռը բացեցի, տեսա, որ ամբողջ տունը ջրով լցված է, անհնար է տուն մտնել: Ամեն ինչ` սնունդը, հագուստը, իրերը ջրի մեջ էին: Մի կերպ փորձել եմ ջուրը քաշել, դատարկել, իսկ գիշերը մնացել ենք մեր հարեւանի տանը: Առավոտյան վեր եմ կացել, այդ կոյուղաջուրը փորձել եմ դատարկել, աղբը քերել: Հիմա այդ տնակում ենք, ահավոր շան հոտ է գալիս, նեխահոտ: Մեր մյուս հարեւանի տունն էլ է լցվել կոյուղաջուրը: Ողջ գիշերը երեխաների հագուստներն եմ լվացել, անկողիններն եմ հանել դուրս, որ ցեխի մեջ էին >,- մեր զրույցի ժամանակ նշեց տիկին Անուշը:
Տուժած քաղաքացին ասում է, որ իրենց տնակի մոտ նավթաբազա են կառուցել, շինարարություն են արել, պատ են շարել, որտեղից ջրերը հոսում, գալիս, իրենց տուն են լցվում:
<Երրորդ տարին է, ինչ եկել, կառուցել են, ջրերը լցվում են մեր տները: Երեք տարի է, ինչ այս վիճակում ենք, այս կեղտաջրերի մեջ երեխաները կարող են հիվանդանալ, ամեն օր այս կեղտն են շնչում>,- ասաց տիկին Անուշը:
Վարսիկ Կլեկչյանը, որը նույնպես ապրում է նշված հասցեում, մեզ հետ զրույցում նշեց, որ անձրեւը գալիս, ջուրը լցվում է տները, բակը, չեն կարողանում տնից դուրս գալ:
<Հիմա, ներկա պահին իմ բակը ցեխաջրի մեջ է, ահավոր տիղմի հոտ է գալիս, չեք պատկերացնի, թե ինչ է կատարվում այստեղ: Անընդհատ կոյուղաջուրը գալիս-լցվում է մեր բակ: Գոնե այդ տարածքը փակեն: Դիմել ենք <Վեոլիա-ջուր> ընկերություն, ասել են` մեր գործը չէ>,- ասաց Վարսիկը:
Անուշ Զաքարյանն ասում է, որ որդին դիմել է պետական կառույցներին, սակայն ոչ մեկը չի արձագանքել, իսկ այդ տնակներում ապրել հնարավոր չէ, գարշահոտ է գալիս:
Մենք փորձեցինք կապ հաստատել Երեւանի քաղաքապետարանի հետ, սակայն մեր զանգերին չպատասխանեցին: Պարզաբանում ստանալու դեպքում կներկայացնենք այն անմիջապես:
Իրավիճակի մասին տեղեկացել է նաեւ Երեւանի ավագանու անդամ Քրիստինե Վարդանյանը, որը պատրաստ է գնալ ահազանգի հետքով:
Թագուհի Հակոբյան
ՀԱՅՏԱՐԱՐՈՒԹՅՈՒՆ Վագոն տնակում ապրող ընտանիք է՝ չորս անչափահաս երեխաներով, որոնց մայրը լքել է
