Միլիարդատեր և Microsoft-ի համահիմնադիր Բիլ Գեյթսը հայտարարել է, որ առաջիկա 20 տարիների ընթացքում իր անձնական կարողության գրեթե ամբողջ մասը կնվիրաբերի բարեգործական և մարդասիրական նպատակներին։ «Ես գրեթե ամբողջ կարողությունս կփոխանցեմ Գեյթսի հիմնադրամին՝ աշխարհում կյանքեր փրկելու ու բարելավելու համար։ Իսկ 2045 թվականի դեկտեմբերի 31-ին հիմնադրամը ընդմիշտ կփակի իր դռները», — ասել է Գեյթսը։
Միլիարդատիրոջ հիմնադրամը նախատեսել է հաջորդ 20 տարվա ընթացքում նվիրաբերել ընդհանուր առմամբ 200 միլիարդ դոլար՝ կրկնակի ավելի, քան կազմակերպության 25-ամյա գոյության ընթացքում։
Հիմնադրումից ի վեր հիմնադրամը միջոցներ է հատկացրել, մասնավորապես, ՁԻԱՀ-ի, տուբերկուլյոզի և մալարիայի դեմ պայքարի ծրագրերին։
