Մենք ակնկալում ենք Ուկրաինայի և Ռուսաստանի նախագահներ Վլադիմիր Զելենսկու և Վլադիմիր Պուտինի հանդիպումը որքան հնարավոր է շուտ։ Այս մասին հայտարարել է Ուկրաինայի արտաքին գործերի փոխնախարար և Ստամբուլում գտնվող պատվիրակության անդամ Սերգեյ Կիսլիցան, հաղորդում է «Ստրանա» հրատարակությունը։
«Մենք չպետք է թուլանանք այս փուլում։ Եվ կան բազմաթիվ հարցեր, որոնք միայն առաջնորդները կարող են լուծել՝ հաշվի առնելով խնդիրների բարդությունը և Ռուսաստանի բնույթը, որտեղ Պուտինը լուծում է գրեթե բոլոր հարցերը։ Մենք ակնկալում ենք, որ հանդիպումը կկայանա որքան հնարավոր է շուտ», — ասել է նա։
Ավելի վաղ պաշտպանության նախարար և ուկրաինական պատվիրակության ղեկավար Ռուստեմ Ումերովը հայտարարել էր, որ ընթանում են երկու պետությունների ղեկավարների հանդիպման նախապատրաստական աշխատանքներ։
Ռուսաստանի նախագահի օգնական և ռուսական պատվիրակության ղեկավար Վլադիմիր Մեդինսկին հայտարարել է, որ Մոսկվան ի գիտություն է ընդունել Կիևի ցանկությունը՝ անցկացնել պետությունների ղեկավարների հանդիպում։
