Չինաստանի Հանչժոու քաղաքում անցկացվել է մարդանման ռոբոտների բռնցքամարտի աշխարհի առաջին մրցաշարը՝ Unitree Fist King: Awakening, որը կազմակերպել էր Unitree Robotics-ը։ Միջոցառմանը ներկայացվել են մուայ թայ ոճով մենամարտեր մարդանման ռոբոտների միջև՝ ցուցադրելով ռոբոտաշինության ոլորտում առաջընթացը:
Մինչ ռինգ մտնելը Unitree-ի ինժեներները, ինչպես գրում է Habr-ը, կատարել են մեքենաների մանրակրկիտ պատրաստում՝ կենտրոնանալով դրանց հավասարակշռությունը և կայունությունը պահպանելու ունակության վրա։ Յուրաքանչյուր ռոբոտ հագեցած էր LiDAR սենսորներով և խորության չափման տեսախցիկներով, ինչը նրանց թույլ էր տալիս կատարել հարվածների բարդ համակցություններ:
Մասնակիցները հեռակառավարվում էին ինժեներների չորս թիմերի կողմից: Նրանք օգտագործել են խաղային վահանակներ և ձայնային հրամաններ՝ ապահովելով իրական ժամանակի կառավարում:
Մրցույթի կանոնների համաձայն՝ գրանցվում է պարտություն, եթե ռոբոտն ընկնելուց հետո ութ վայրկյանում չի կարողանում ոտքի կանգնել։ Անկման պատճառը կարող է լինել կամ հավասարակշռության կորուստը կամ հակառակորդի հարվածը:
Unitree Fist King: Awakening միջոցառման հիմնական նպատակն էր ցուցադրել ընկերության տեխնոլոգիական հնարավորությունները և փորձարկել ինժեներական լուծումները դինամիկ միջավայրում: Ընկերությունն արդեն հայտարարել է 2025 թվականի դեկտեմբերին ռոբոտների երկրորդ մարտն անցկացնելու պլանների մասին՝ խոստանալով հաշվի առնել առաջին մրցաշարի դասերը և հաջորդ մրցումները դարձնել ավելի դիտարժան ու դինամիկ։
