Վերջերս Lragrogh.com-ի խմբագրություն էր զանգահարել Լոռու մարզի Սվերդլով գյուղից Հասմիկ Այվազյանը եւ պատմել, թե ինչպես է խոշոր եղջյուրավոր կենդանիների շրջանում վարակ տարածվել, ինչի պատճառով գյուղում տասը կենդանի է սատկել, դրանցից երեքն իրենց ընտանիքին էր պատկանում: Եվ քանի որ Հասմիկենց ընտանիքն ապրում է միայն այդ կենդանիների միջոցով, իրենք կանգնել են օրվա ապրուստ հայթայթելու խնդրի առջեւ: Գյուղացին հետաքրքրվում էր, թե պետությունն ինչպես պետք է փոխհատուցի իրենց կրած վնասի դիմաց:
ՀՀ վարչապետի աշխատակազմին ուղղված մեր հարցմանը պատասխանել են Էկոնոմիկայի նախարարությունից, որը ներկայացնում ենք ստորեւ:
<Ի պատասխան ՀՀ վարչապետի աշխատակազմին ուղղված Ձեր հարցման` հայտնում ենք, որ գյուղատնտեսական կենդանիների անկումների եւ հարկադիր սպանդի դեպքում սեփականատիրոջը ցուցաբերվող օժանդակությունը տրամադրվում է բացառապես ՀՀ կառավարության 2024թ. հունիսի 6-ի <Կենդանիների վարակիչ հիվանդությունների դեմ պայքարում ընկած, ոչնչացված կամ սանիտարական սպանդի (հարկադիր մորթի) ենթարկված կենդանիների փոխհատուցման կարգը եւ կենդանիների ոչնչացման կամ հարկադիր մորթի իրականացման պայմանները, դեպքերը եւ կարգը սահմանելու մասին> N 846- Ն որոշման N 1 հավելվածի 21-րդ կետով հաստատված հիվանդությունների դեպքում:
Տեղեկացնում ենք նաեւ, որ ՀՀ էկոնոմիկայի նախարարությունը Հայաստանի Հանրապետության պետական բյուջեից ֆինանսավորում է միայն գյուղատնտեսության ոլորտի պետական օժանդակության ծրագրերը, որոնց մասին տեղեկատվությունը ներկայացված է նախարարության կայքէջում:
Միաժամանակ հարկ է նշել, որ փոխհատուցման հարցը կարող է դիտարկվել մարզային մակարդակով>:
Թագուհի Հակոբյան
