ՀՀ Պաշտպանության նախարարությունը արձագանքել է մամուլում տարածված տեղեկություններին, ըստ որոնց Կապանում զինծառայող է գտնվել հրազենային վնասվածքով։ Նախարարության հաղորդմամբ՝ տարածված տեղեկությունը ներկայացվել է աղավաղված ձևով։
Ըստ նախնական տվյալների՝ զինծառայողը թեթև մարմնական վնասվածք է ստացել զենքի օգտագործման կանոնների խախտման հետևանքով։ Նշվում է, որ նրա առողջությանը և կյանքին վտանգ չի սպառնում։
Վնասվածք ստացած զինծառայողը բուժօգնություն է ստացել կայազորային հոսպիտալում։ Պաշտպանության նախարարությունը հավելում է, որ այս պահին անհրաժեշտություն չի եղել զինծառայողին տեղափոխելու Երևանի Կենտրոնական կլինիկական զինվորական հոսպիտալ։
Նախարարությունը հորդորում է լրատվամիջոցներին հրապարակելուց առաջ ստուգել տեղեկությունները և առաջնորդվել պաշտոնական աղբյուրներով՝ խուսափելու համար հանրության մոլորեցումից։
