Լեռնային Ղարաբաղից Հայաստան մուտք գործած մեր հայրենակիցների հոսքը երեկվա դրությամբ շատացել է:
«Լուրերի» ուղիղ եթերում ԼՂ-ում հումանիտար ճգնաժամի կառավարման աշխատանքային խմբի ներկայացուցիչ Վարդան Սարգսյանը մանրամասներ է ներկայացրել Կոռնիձորում գտնվող հումանիտար կայանում իրականացվող աշխատանքներից՝ ընդգծելով, որ հոսքը չի դադարում:
«Կոռնիձորում գտնվող հումանիտար կայանը մշտական ռեժիմով դիմավորում է քաղաքացիներին: Անհրաժեշտ գրանցումը և անհրաժեշտ գործընթացները տեղում կատարվում են»,- մանրամասնել է Վարդան Սարգսյանը՝ հավելելով, որ Հայաստան մուտք գործելուց հետո կատարվում է ԼՂ մեր հայրենակիցների կարիքների գնահատում:
«Քաղաքացիների ընդունման և մեքենաների շարժի հետ կապված ընդհանուր գործընթացը կառավարելի է:
Նշեմ նաև, որ այս ամբողջ գործընթացը բավականին մեծ ուշադրության կենտրոնում է, այստեղ բազմաթիվ լրատվամիջոցներ, այդ թվում՝ միջազգային, ականատես ենք լինում, որ լուսաբանում են իրավիճակը»,- ասել է Սարգսյանը:
Նա նաև տեղեկացրել է, որ անհրաժեշտության դեպքում Գորիսում բացված կենտրոնի կարողությունները կմեծացվեն:
