Մարդկանց միջազգային թրաֆիքինգի ցանցերի դեմ ուղղված լայնածավալ գործողության շրջանակում 59 երկրների իրավապահներ ամբողջ աշխարհում ձերբակալել են ավելի քան 1000 մարդու։ Ձերբակալությունները տեղի են ունեցել հինգ օրվա ընթացքում Աֆրիկայում, Հյուսիսային և Հարավային Ամերիկայում, Եվրոպայում և Ասիայում։ Այս մասին ասվում է Ինտերպոլի մամուլի հաղորդագրության մեջ, գրում է DW-ի ռուսական ծառայությունը։ «Գլոբալ շղթա» (Global Chain) կոդային անվանումով գործողությունը կազմակերպվել է Ռումինիայի և Ավստրիայի իշխանությունների կողմից՝ Ինտերպոլի, Եվրոպոլի, Ամերիպոլի և Եվրոպական սահմանային գործակալության՝ Frontex-ի համակարգմամբ։ Ինտերպոլի տվյալներով՝ հայտնաբերվել է ավելի քան երկու հազար զոհ, այդ թվում՝ մարմնավաճառության, մուրացկանության և նույնիսկ հանցավոր գործունեության հարկադրված անձինք։ Տուժածների մեծ մասն Արգենտինայի, Կոլումբիայի, Վենեսուելայի, Մոլդովայի և Նեպալի քաղաքացիներ են։ Նրանց տասը տոկոսն անչափահասներ են։ Հանցագործները թիրախավորել են խոցելի խմբերի։ Խաբեության կամ հարկադրանքի միջոցով նրանք մարդկանց ուղարկել են այլ երկրներ և նույնիսկ այլ մայրցամաքներ, ասվում է Ինտերպոլի հաղորդագրությունում։ Մասնավորապես, Բրազիլիայում վերացվել է միջազգային հանցավոր ցանց, որը մարդկանց ուղարկել է Կամբոջա, որտեղ նրանց ստիպել են աշխատել առցանց խարդախության կենտրոններում: Բելգիայում ձերբակալվել է 17 մարդ, որոնք կասկածվում են անչափահասներին առցանց հավաքագրելու, ապա Բելգիայում և Ֆրանսիայում մարմնավաճառության հարկադրելու մեջ: Ինտերպոլը հայտարարել է, որ մարդկանց թրաֆիքինգը մնում է աշխարհում կազմակերպված հանցավորության ամենաշահութաբեր և տարածված ձևերից մեկը։ «Մեր արձագանքը պետք է լինի նույնքան գլոբալ, համակարգված և անզիջում»,- նշել է կազմակերպությունը: Թարգմանությունը՝ Էմմա Չոբանյանի
Ամբողջական հոդվածը կարող եք կարդալ այս հասցեով՝ https://factor.am/1038597.html?fbclid=IwcGRvZgFmZGlkFlCh19T5do7WrVtMKQkF4gyGwbE9H1xleHRuA2FlbQIxMQBzcnRjBmFwcF9pZAo2NjI4NTY4Mzc5AAEekSiqTxFgrUdpppSioEaUJrBBFJBq1ql9DzU1XprMOxIFtPOpdSluZwfiC40_aem_eZf97n2zqqCe2CO2kK1H1g
© factor.am
