Հակակոռուպցիոն կոմիտեից լրատվամիջոցներին հայտնել են, որ ձերբակալվել են Վանաձորում և Գյումրիում Եվրամիության դրամաշնորհային ծրագրի ղեկավար Նատալիա Լափաուրին և փորձագետ Դավիթ Մելքոնյանը։
«ՀՀ հակակոռուպցիոն կոմիտեում նախաձեռնված քրեական վարույթի շրջանակում ձերբակալվել է Վանաձորի համայնքապետարանի կողմից իրականացվող ծրագրի ղեկավար Ն. Լ.-ն:
Վերջինս մեղադրվում է կաշառք ստանալու, իրեն վստահված գույքը հափշտակելու, փողերի լվացման և պաշտոնեական կեղծիք կատարելու մեջ:
Ձերբակալվել է նաև նույն ծրագրի փորձագետը, ում մեղադրանք է առաջադրվել կաշառք ստանալուն օժանդակելու համար։ Նախաքննության շահերից ելնելով՝ այս պահին այլ տեղեկատվություն հայտնել չենք կարող»,- հայտնել են կոմիտեից:
Ըստ տեղեկությունների՝ քրեական վարույթը վերաբերում է ԵՄ դրամաշնորհային միջոցներով 2024 թվականին Վանաձորին և Գյումրիին հատկացված էլեկտրական ավտոբուսների շահագործման խնդիրներին։
Եվրամիության տրամադրած ավելի քան 4 միլիոն եվրոյի շրջանակում համապատասխան գնումներն ու մրցույթներն իրականացվել էին դեռ երկու տարի առաջ, և քաղաքները հենց այդ ժամանակ էլ պետք է ստանային ավտոբուսները։ Նատալիա Լափաուրին գլխավորում էր հենց այս ծրագիրը։
