Գլխավոր դատախազության պետական շահերի պաշտպանության վարչությունում ուսումնասիրվել են Երևան քաղաքի Արամի փողոցի 32 հասցեում գտնվող շենքի՝ նախկին «Մանկական աշխարհ» հանրախանութի՝ 6198 քմ մակերեսով հողամասի մասնավորեցման վերաբերյալ փաստաթղթերը, որում հայտնաբերվել է առերևույթ հանցանքի դեպք՝ դատախազը հանցանքի մասին հաղորդում է ներկայացրել Հակակոռուպցիոն կոմիտե:
Երևանի Կենտրոն համայնքին նվիրաբերված, պատմամշակութային հուշարձան հանդիսացող «Մանկական աշխարհ» նախկին հանրախանութի շենքը 2001 թվականի սեպտեմբերի 6-ին Կենտրոն թաղային համայնքի և «Սոգլասիե-Արմենիա» ՍՊ ընկերության միջև կնքված ուղղակի վաճառքի պայմանագրով օտարվել է:
2023 թվականի հոկտեմբերի 10-ին Հակակոռուպցիոն կոմիտեում նախաձեռնվել է քրեական վարույթ՝ Քրեական օրենսգրքի 441-րդ հոդվածի 1-ին մասով (պաշտոնատար անձի կողմից իշխանական կամ ծառայողական լիազորությունները կամ դրանցով պայմանավորված ազդեցությունը չարաշահելը կամ լիազորություններն անցնելը):
«Սոգլասիե Արմենիա» ՍՊԸ-ի իրական սեփականատեր են հանդիսանում Հրաչյա Սարգսյանը, Վարդան Թունյանը և Ավետ Ադոնցը։ Վարդան Թունյանը ոստիկանության ներքին աուդիտի վարչության նախկին պետն է։ Նա այժմ ոստիկանության նախկին պետ Վլադիմիր Գասպարյանի և վերջինիս տեղակալ Լևոն Երանոսյանի հետ միասին մեղադրյալի կարգավիճակ ունի մեկ այլ քրեական գործով։
Ավետ Ադոնցը նախկին դեսպան է, ինչպես նաև 2019-2021 թվականներին եղել է արտաքին գործերի նախարարի տեղակալ։ 2021-ին հեռացել է պաշտոնից՝ սեփական դիմումի համաձայն։
Ըստ իրավաբանական անձանց էլեկտրոնային ռեգիստրի տվյալների՝ «Սոգլասիե-Արմենիա»-ի միակ մասնակիցը «Սոգլասիե» ՓԲԸ-ն է, որը գրանցված է Մոսկվայում ու պատկանում է Արա Աբրահամյանին։ «Սոգլասիե-Արմենիա»-ում բաժնեմաս է ունեցել նաև Աբրահամյանի եղբայրը՝ Սերյոժա Աբրահամյանը, որը 2003-2007 թթ. եղել է անկուսակցական պատգամավոր, իսկ 2007-ին պատգամավոր է դարձել ՕԵԿ-ից:
Ի դեպ, «Սոգլասիե-Արմենիա»-ն պետական գրանցում է ստացել 2001 թվականի օգոստոսի 31-ին՝ Արամի 32 շենքի մասնավորեցումից օրեր առաջ։
Հանրախանութի՝ Երևանի կենտրոնում գտնվող շենքը այժմ դատարկ է, այնտեղ որևէ գործունեություն չի իրականացվում։
Վովա Հակոբյան
