ՆԳՆ ոստիկանության Լոռու մարզային վարչության և Թումանյանի բաժնի քրեական հետախույզները հանցագործությունների կանխման, նախականխման և բացահայտման շրջանակում ձեռնարկած օպերատիվ-հետախուզական միջոցառումների արդյունքում «Հայանտառ» ՊՈԱԿ-ի Թումանյան մասնաճյուղի Դսեղի տեղամասում հայտնաբերել են առանց համարանիշերի և անհրաժեշտ փաստաթղթերի «ԿամԱԶ» ավտոմեքենա, որը բեռնված էր 15 խմ հաճարենու կոճղերով:
27-ամյա վարորդը, որը չուներ վարորդական իրավունքի վկայական, ինչպես նաև երեք ուղևորները հայտնել են, որ Դսեղի տեղամասում բենզասղոցով հատել, ապա մասնատել են հաճարենիներ և բեռնել ավտոմեքենան: Նրանք փայտանյութի ձեռք բերման վերաբերյալ որևէ փաստաթուղթ չեն ներկայացրել:
Փայտանյութով բեռնված «ԿամԱԶ»-ը անսարքության պատճառով հնարավոր չի եղել տեղափոխել բաժնի հատուկ պահպանվող տարածք, ուստի նշված վայրում նշանակվել է ոստիկանական վերակարգ:
Չորս տղամարդիկ ներկայացվել են ոստիկանության Թումանյանի բաժին:
Կազմված փաստաթղթերն ուղարկվել են Թումանյանի քննչական բաժին:
Հանգամանքները պարզվում են:
