ԱՀԿ-ի փորձագետներն առաջարկել են արգելել իվերմեկտինի և VV116 փորձարարական դեղամիջոցի օգտագործումը կորոնավիրուսային վարակի ցանկացած ձևի բուժման համար, ինչպես նաև առաջարկել են մեղմ Covid-ով հիվանդներին բաժանել երեք ռիսկային խմբերի՝ կախված հիվանդանոցում հայտնվելու հավանականությունից։ ԱՀԿ-ի թարմացված առաջարկությունները հրապարակվել են ուրբաթ օրը BMJ գիտական ամսագրում։
«Վերջին կլինիկական փորձարկումները մեզ հանգեցրել են այն եզրակացության, որ իվերմեկտինը և VV116 հակավիրուսային դեղամիջոցը չպետք է օգտագործվեն COVID-19-ի մեղմ և ծանր ձևերի բուժման համար: Դա պայմանավորված է ինչպես իվերմեկտինի կողմնակի ազդեցությունների առկայությամբ, այնպես էլ այն փաստով, որ VV116 փորձարկումից ստացված տվյալների որակն այնքան վատ էր, որ թույլ չտվեց գնահատել այս դեղամիջոցի ընդունման ազդեցությունը», — գրել են հետազոտողները:
Իվերմեկտին հակամակաբույծ դեղամիջոցը գրավել է հանրության հետաքրքրությունը՝ կապված այն լուրերի հետ, որ այն կարող է ճնշել կորոնավիրուսի վերարտադրությունը։ Այս պնդումները չհիմնավորվեցին, ինչի պատճառով ԱՀԿ-ն 2021 թվականի մարտին ուղեցույցներ թողարկեց՝ նախազգուշացնելով կլինիկական փորձարկումներից դուրս իվերմեկտինի օգտագործման դեմ: Հետագա հետազոտությունները ցույց են տվել, որ իվերմեկտինն ունեցել է կողմնակի ազդեցություններ, ինչը ստիպել է փորձագետներին խորհուրդ տալ ամբողջության հրաժարվել դրա օգտագործումից՝ Covid-ի հետ կապված ցանկացած համատեքստում:
ԱՀԿ-ի փորձագետները նմանատիպ առաջարկություն են արել VV116 հակավիրուսային դեղամիջոցի վերաբերյալ, որը մշակվել է Ուհանի վիրուսաբանության ինստիտուտի (Չինաստան) մասնագետների կողմից՝ 2020 թվականի համաճարակի առաջին ամիսներին: Դրա գործողության մեխանիզմը նման է ռեմդեսիվիրին՝ կորոնավիրուսային վարակի հանրաճանաչ միջոցին, որն ընդգրկված է ԱՀԿ-ի ներկայիս առաջարկություններում՝ Covid-ի մեղմ ձևերի բուժման համար:
Անցյալ տարեվերջին չինացի գիտնականներն ամփոփել են կորոնավիրուսային վարակի բուժման համար VV116-ի օգտագործման առաջին կլինիկական փորձարկումների արդյունքները։ Այս փորձարկումների արդյունքների որակը, ըստ ԱՀԿ-ի փորձագետների, պարզվեց, որ այնքան ցածր է եղել, որ նրանք թույլ չեն տվել որևէ հստակ եզրակացություն անել այն մասին, թե ինչպես է VV116-ի ընդունումն ազդում COVID-ից հիվանդացության և մահացության վրա։ Այդ իսկ պատճառով ԱՀԿ-ի փորձագետները կտրականապես խորհուրդ են տալիս չօգտագործել այս դեղամիջոցը կլինիկական փորձարկումներից դուրս:
Բացի սրանից, ԱՀԿ-ի փորձագետները մշակել են մի շարք չափանիշներ, որոնք կօգնեն բժիշկներին Covid-ի մեղմ ձևերով հիվանդներին բաժանել երեք խմբի՝ կախված նրանց հետագա հոսպիտալացման վտանգից։ Փորձագետները հուսով են, որ հիվանդների գնահատման նման համակարգը կնվազեցնի վարակի տարածման ռիսկը, կբարձրացնի հիվանդների գոյատևումը և կբարելավի COVID-19-ի բուժման համար դեղերի հասանելիությունը։
