«Այս տարիների ընթացքում առաջին անգամ ունենք իրավիճակ, որ ամանորի լուսավորություն իրականացնելու համար օգտագործելու ենք նախորդ տարվա ընթացքում ձեռք բերված գույքը»:
Այս մասին Երևանի քաղաքապետարանում հրավիրված ասուլիսի ժամանակ հայտնեց քաղաքապետի տեղակալ Սուրեն Գրիգորյանն՝ ընդգծելով, որ մեկ տարի անց կարևոր է արձանագրել, որ այն ծախսերը, որ արվել էին անցյալ տարի ամանորյա զարդարանք ձեռք բերելու համար արդարացված են:
Գրիգորյանը նաև նկատեց. «Գաղտնիք չէ, որ անցյալ տարի շատ քննարկվեց հատկապես լոկացիաներից մեկում՝ Հանրապետության հրապարակում և դրա շենքերի վրա կատարված աշխատանքը, անցքերը: Ինչպես անցած տարի խոստացանք, բոլոր անցքերը փակվել են: Այս տարի Հանրապետության հրապարակի շենքերի զարդարումը իրականացվելու է մի փոքր այլ եղանակով: Պատկերը, որ տեսել եք անցյալ տարի նույն է լինելու, բայց տեխնիկական առումով պատրաստվելու են թեթև մետաղական կոնստրուկցիաներ՝ կառկասներ, որոնց վրա ամրացվելու են սարքավորումները: Էլի անցքեր լինելու են, բայց անհամեմատելի փոքր քանակով և հիմնականում այն անցքերը, որոնք անցած տարի բացվել են և լցվել, և ինչպես անցյալ տարի այնպես էլ հիմա՝ ծրագրի ավարտից հետո լցվելու են»:
Գրիգորյանը նշեց՝ հաշվի առնելով, որ այս տարի չունեն այն հրատապության հրամանը, որը ունեցել են անցած տարի կապված «Մանկական եվրատեսիլ»-ի բացման արարաողության հետ այս տարի փոքր ինչ ուշ են վառվելու թե՛ ամանորյա, թե՛ տոնածառի լույսերը:
