Հայաստանում Ուգանդայի դեսպան Մուհամմադ Թեզիկուբա Կիսամբիրան, որը ներկայացնում էր նաև աֆրիկյան այս երկիրը Ադրբեջանում, Աֆղանստանում, Իրաքում, Պակիստանում, Պաղեստինում, Ղրղզստանում, Տաջիկստանում, Թուրքմենստանում, Իրաքում և Իրանում (որպես ռեզիդենտ), մահացել է Իրանում անհայտ հիվանդությունից։
Նրա մարմինը տեղափոխել են հայրենիք և թաղել այն գյուղում, որտեղ ծնվել է, գրում են լրատվամիջոցները։
Ուգանդական լրատվամիջոցները հայտնում են, որ երկրի նախագահ Յովերի Մուսևենին 2020 թվականին նրան մշտական դեսպան է նշանակել մի քանի երկրում, քանի որ Ուգանդայի ֆինանսական միջոցները թույլ չեն տալիս դեսպանատներ բացել շատ երկրներում:
Հաղորդվում է, որ դիվանագետը մահացել է օգոստոսի 4-ին Իրանում անհայտ հիվանդությունից: Օգոստոսի 15-ին նրա մարմինն ինքնաթիռով տուն է ուղարկվել։ Օգոստոսի 19-ին Բուլապա գյուղում տեղի է ունեցել դեսպանի հուղարկավորությունը։ Արարողությանը ներկա են եղել Ուգանդայի արտաքին գործերի նախարարության բարձրաստիճան պաշտոնյաներ, այդ թվում՝ այս երկրի դեսպանները Ռուսաստանում, Գերմանիայում, Սուդանում և Սաուդյան Արաբիայում։
Ուգանդայի արտաքին գործերի պետական նախարար Օկելլո Օրիեման ասել է, որ դեսպանը վարակվել է անհայտ հիվանդությամբ և մահացել է մի քանի օր հիվանդության դեմ պայքարելուց հետո:
