ՆԱՏՕ-ն վճռականորեն աջակցում է Ադրբեջանի և Հայաստանի միջև հարաբերությունների կարգավորմանը։
Այս մասին «X»-ի իր միկրոբլոգում գրել է Հարավային Կովկասի և Կենտրոնական Ասիայի տարածաշրջանում ՆԱՏՕ-ի գլխավոր քարտուղարի հատուկ ներկայացուցիչ Խավիեր Կոլոմինան։
«Ողջունում եմ Հայաստանի և Ադրբեջանի համատեղ հայտարարությունը, որում նշվում է կալանավորների փոխադարձ ազատ արձակման, վստահության ամրապնդման այլ միջոցների և երկար սպասված խաղաղության պայմանագրի մասին»,- գրել է պաշտոնյան:
Հիշեցնենք՝ երեկ հրապարակվել էր ՀՀ վարչապետի աշխատակազմի և Ադրբեջանի նախագահի վարչակազմի համատեղ հայտարարությունը գերիների փոխադարձ ազատ արձակման մասին: Ավելի ուշ ադրբեջանական լրատվամիջոցները հրապարակել էին ազատ արձակվող հայ զինծառայողների անունները։
