Իրենց նոր տունը Չինարիում է. ինչպես ու ինչի սպասումով են ապրում արցախցիները
Բռնի տեղահանված արցախցիներից շատերը Հայաստան տեղափոխվելուց հետո հրաժարվում էին սահմանամերձ բնակավայրերում հաստատվել։ Չինարին տարբերվեց․ չնայած սահմանից ընդամենը մի քանի 100 մետր հեռավորությանը, այստեղ տասնյակից ավելի ընտանիքներ հաստատվեցին։
Սահմանամերձ Չինարի գյուղում հաստատված 11 արցախցի ընտանիքները դեռևս խնդիրներ ունեն, բայց մի հարցում կայունություն ու որոշակիություն կա՝ իրենց նոր տունը Չինարիում է։ Sputnik Արմենիան 2 ամիս առաջ արդեն եղել է Չինարիում, երբ ընտանիքները նոր էին սահմանամերձ գյուղ տեղափոխվել և պատկերացում չունեին ոչ միայն ապագայի, այլև հաջորդ օրվա մասին։ Ամանորին որոշեցինք կրկին գնալ այնտեղ՝ զրուցելու ընտանիքների հետ, տեսնելու՝ ինչ պայմաններում, ինչպես ու ինչի սպասումով են ապրում։
