Օգոստոսի 28-ին Ֆրանսիայի նախագահ Էմանուել Մակրոնի՝ դեսպանների համաժողովի ժամանակ հնչեցրած կարծիքները, որոնք «կեղծ պատկերացումներ են կազմում տարածաշրջանում ստեղծված իրավիճակի մասին և միակողմանիորեն պաշտպանում Հայաստանը, վնասում են խաղաղության գործընթացին» (չակերտները — Tert.am)։
Այս մասին ասել է Ադրբեջանի արտաքին գործերի նախարարության մամուլի ծառայության ղեկավար Այխան Հաջիզադեն՝ մեկնաբանելով դեսպանների համաժողովում Ֆրանսիայի նախագահ Էմանուել Մակրոնի հայտարարությունները, գրել են ադրբեջանական լրատվամիջոցները։
Ֆրանսիայի նախագահ Էմանուել Մակրոնը դեսպանների համաժողովում ասել է, որ այս շաբաթ բանակցություններ կվարի Հայաստանի և Ադրբեջանի ղեկավարների հետ և հանդես կգա նոր դիվանագիտական նախաձեռնությամբ՝ Լեռնային Ղարաբաղում հակամարտությունը կարգավորելու համար։
Նշվում է, որ «Ֆրանսիայի նախագահի հերթական հայտարարությունը, որը հիմնված է տարածաշրջանում հումանիտար իրավիճակի մասին հայտարարությունների վրա, հերթական անգամ խոսում է այս երկրի սխալ քաղաքականության մասին» (չակերտները — Tert.am)։
«Անհասկանալի է, թե ինչու ֆրանսիական կողմը, որը չդատապարտեց Հայաստանի կողմից Ադրբեջանի դեմ 30-ամյա օկուպացիան և ագրեսիան, չմեկնաբանեց օկուպացիայի հետևանքով շուրջ 1 միլիոն փախստականների և հարկադիր վերաբնակների հումանիտար իրավիճակը, դատապարտում է 2020 թվականի 44-օրյա Հայրենական պատերազմը, որի ընթացքում Ադրբեջանը ազատագրել է իր հողերը՝ համաձայն ՄԱԿ-ի կանոնադրության և միջազգային իրավունքի նորմերի ու սկզբունքների, իր ելույթներում կենտրոնանում է տարածաշրջանում հումանիտար իրավիճակի մասին հայտարարությունների վրա» (չակերտները — Tert.am) ,- հայտնել է Հաջիզադեն։
Ըստ ադրբեջանական կողմի՝ «անընդունելի է, որ Ֆրանսիայի նախագահը, որը բառապաշարում օգտագործեց այնպիսի արտահայտություններ, ինչպիսին է «Լաչինի մարդասիրական միջանցքը», խոսեց ճնշման լեզվով» (չակերտները — Tert.am)։
«Սա անհարգալից վերաբերմունք է Ադրբեջանի տարածքային ամբողջականության և ինքնիշխանության նկատմամբ» (չակերտները — Tert.am) ,- ասել է Ադրբեջանի ԱԳՆ մամուլի խոսնակը։
