խոշոր հրդեհ է տեղի ունեցել Երևանում։ ՀՀ Ներքին գործերի նախարարության փրկարար ծառայության 9-11 ճգնաժամային կառավարման ազգային կենտրոն ահազանգ է ստացվել որ Մոնթե Մելքոնյան փողոցում կառուցված էլիտար թաղամասի թիվ 52/1 շենքի 16-րդ հարկի բնակարաններից մեկում կրակ ու ծուխ է նկատվում։
Ինչպես դեպքի վայրից հայտնում է ֆոտոլրագրող Գագիկ Շամշյանը կրակն ու ծուխը նկատվում է մի քանի կիլոմետրից։
Օպերատիվորեն դեպքի վայր են ժամանել ՀՀ Ներքին գործերի նախարարության փրկարար ծառայության Երևանի թիվ 1 Հրշեջ փրկարարական ջոկատից 2 մարտական հաշվարկ և թիվ 13 ՀՓՋ-ի ավտոսանդուղքը։
Բնակարանում ծխապատ գոտի է, հրշեջ-փրկարարները փորձում են բացել բնակարանի դուռը։
Դեպքի վայր է ժամանել նաև ԵՓՎ ՀՓԱԿ խումբը։
Ըստ նախնական տեղեկությունների 3 հոգի տեղափոխվել են Այրվածքաբանության կենտրոն, նրանց տեղում առաջին բուժօգնությունն են ցուցաբերել օպերատիվորեն ժամանած Երևանի 1-03 շտապբուժօգնության բժիշկների հերթապահ խմբերը։
Օպերատիվորեն ժամանել են նաև ՀՀ ՆԳՆ ոստիկանության պարեկային ծառայության Երևան քաղաքի գնդի 2-րդ գումարտակի 1-ին վաշտի պարեկները գնդի հրամանատար Անդրանիկ Իսախանյանի, գնդի հրամանատարի տեղակալներ Անդրանիկ Խաչատրյանի, Լևոն Մանուկյանի, գումարտակի հրամանատար Արսեն Ստեփանյանի, գումարտակի հրամանատարի տեղակալ Դավիթ Նիկողոսյանի և վաշտի հրամանատար Հայկ Արոյանի գլխավորությամբ։
Տարածքը սահմանազատել են նույն վաշտի պարեկներ Աղասի Պողոսյանն ու Կարեն Գյուլամիրյանը։
ժամանել են ոստիկանության Մալաթիայի բաժնի օպերատիվ խումբը՝ բաժնի պետ Հարություն Դանիելյանի և բաժնի պետի օպերատիվ գծով տեղակալ Րաֆֆի Բագրատունյանի գլխավորությամբ։
Դեպքի մասին ոստիկանության Մալաթիայի բաժնից տեղեկությունը փոխանցել են ՀՀ Քննչական կոմիտեի Երևան քաղաքի քննչական վարչության Մալաթիայի քննչական բաժին, որտեղից ժամանել է քննչական խումբը՝ օրվա պատասխանատու հերթապահ քննիչի գլխավորությամբ։
Դեպքի փաստով Մալաթիայի քննչական բաժնում նախաձեռնվել է քրեական վարույթ, որտեղ էլ պարզվում է բնակարանի սեփականատիրոջ և այրվածքաբանության կենտրոն տեղափոխվածների ինքնությունը։
Գ․ Շամշյանի տեղեկություներով նրանք ընտանիքի անդամներ են, մայրը, հայրը և անչափահաս երեխան, նրանք ըստ նախնական տեղեկություններով ծխահարվել են, սակայն հրաժարվել են հոսպիտալացվելուց։
Լուսանկարները և տեսանյութը՝ Գագիկ Շամշյանի
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով
