Շահրամանյանը միլիարդ դոլարից ավել զենք տվեց Ադրբեջանին, բայց մեկ մեքենա չի ցանկանում տալ Հայաստանին։
Այս մասին «Ֆեյսբուք»-ի իր էջում գրել է քաղաքագետ Էդգար Առաքելյանը՝ շարունակելով.
«Էդ անձը, ով ստորագրեց Արցախի լուծարման փաստաթուղթը, եթե նման դիմադրություն ցույց տար Արցախի համար, ինչպես դիմադրում է իր ծառայողական մեքենայի համար՝ Արցախի այլ կարգավիճակ կունենայինք։
Հ.գ. Հետաքրքիր է, իսկ Ադրբեջանին հանձնված միլիարդ դոլարի զենքի դիմաց Բագրատ Գալստանյանն ինչ-որ բան նվիրելու՞ է Շահրամանյանին»։
Ինչպես ավելի վաղ հայտնել էինք, իրավապահները կոտրել են Հայաստանում Լեռնային Ղարաբաղի ներկայացուցչության դարպասը և առգրավել Լեռնային Ղարաբաղի լուծարման հրամանագիրը ստորագրած Սամվել Շահրամանյանին սպասարկող ծառայողական մեքենան: Դարպասը կոտրել են, քանի որ անվտանգության աշխատակիցը թույլ չի տվել մտնել ներս:
«Հայկական ժամանակ»-ի հետ զրույցում Քննչական կոմիտեից հայտնել են, որ դեռևս 2024 թ․ փետրվարին թմրամիջոցներ իրացնելու, թմրամիջոցների ապօրինի շրջանառության հատկանիշներով կոմիտեում հարուցված և ներկայումս քննվող քրեական վարույթի շրջանակներում քննության համար էական նշանակություն ունեցող հանգամանքներ պարզելու, համապատասխան քննչական գործողություններ կատարելու նպատակով քննիչը «Տոյոտա» մակնիշի ավտոմեքենան առգրավելու որոշում է կայացրել։
Ըստ ՔԿ նախագահի մամուլի քարտուղար Գոռ Աբրահամյանի՝ ավտոմեքենան կնիքվել էր օրեր առաջ, հունիսի 21-ին իրականացվել է այն հատուկ պահպանվող տարածք տեղափոխելն ապահովելու գործընթաց։
Հիշեցնենք՝ հունիսի 7-ին ՀՀ քննչական կոմիտեն առգրավել էր սեփականության իրավունքով Լեռնային Ղարաբաղին պատկանող ավտոմեքենան։ Դա սեփականության իրավունքով ԼՂ-ի նախկին նախագահի թիկնազորին պատկանող ավտոմեքենան է, որը վարում էր Աշոտ Դանիելյանը։
«Հայկական ժամանակ»-ի ունեցած տեղեկություններով՝ մեքենան առգրավելու որոշումը կայացվել էր հենց Աշոտ Դանիելյանին վերաբերող գործի շրջանակներում:
