Արդեն տեղեկացրել ենք, որ «Դեպի ճամբար-հատուկ ջոկատ» գեղարվեստական ֆիլմը հոկտեմբերի 3-ից կլինի բոլոր կինոթատրոններում: Ֆիլմի պրոդյուսեր, սցենարիստ և դերասան Գրիգոր Դանիելյանը մեզ հետ զրույցում նշեց, որ այս ֆիլմը տարիքային սահմանափակում չունի, այն հետաքրքիր կլինի նաև մեծահասակների համար:
«Ի սկզբանե մենք որոշել ենք, որ ֆիլմը որպես առանձին միավոր պետք է հետաքրքիր լինի բոլորի համար, տարիքային շեմը կինոթատրոններում նշված է 12+, բայց, եթե անկեղծ լինեմ, ապա 6 տարեկաններն էլ կարող են դիտել ու հաստատ իրենց համար էլ հետաքրքիր կլինի։
Մենք հաշվի ենք առել նաև, որ այս ֆիլմը պետք է հետաքրքիր լինի մեծերի համար ու արդյունքում՝ (մեր գնահատականով) դա մեզ մոտ ստացվել է, իհարկե, ամենաճիշտ գնահատականը կտա մեր հանդիսատեսը»:
Գրիգորի կարծիքով՝ ֆիլմը մեծահասակները երեխաների հետ կդիտեն առանց լարվածության. «Երբ մենք հեռարձակում էինք «Դեպի ճամբար» հեռուստասերիալը, բազմաթիվ արձագանքներ էի ստանում մեծ տարիքի ներկայացուցիչների կողմից, որոնցում նշում էին, որ իրենք երեխաների հետ սիրով դիտում են ֆիլմը, ամենակարևորը՝ առանց լարվելու, քանի որ լեզուն գռեհիկ չէ, ու մաքսիմալ պահպանպանված է ցենզուրան։
Ըստ Գրիգորի՝ ֆիլմը հետաքրքիր կլինի նաև նրանց համար, ովքեր մինչ այդ նախագծին չեն հետևել:
Ֆիլմում ներգրավել են ինչպես հին կերպարներից շատերին, այնպես էլ նոր դեմքերի:
«Հին կերպարներից շատերը նկարահանվել են, ի դեպ, Ռաֆայել Երանոսյանն է վերադարձել: Դե Գարիկ Սեփխանյանը կա, Վահագն Գալստյանը՝ իր անվտանգության աշխատակցի դերով, Մարիամ Ալեքսանյանը, ով մարմնավորում է ոստիկանի, Հռիփսիմե Ելինյանը (հարուստի երեխայի ծնող): Իհարկե, մեր ֆիլմին միացավ նոր կազմ ևս՝ Լևոն Հարությունյան, Սուրեն Թումասյան, Լիլի Էլբակյան, Լիլիթ Սարգսյան, Սամվել Թոփալյան, Յուլյա Ֆինկ, Վաչե Երիցյան և Տիգրան Գյուլումյան։ Քաստինգ որպես այդպիսին չենք ունեցել, ի սկզբանե պատկերացրել ենք, որ տվյալ դերը լավագույնս կմարմնավորի այսինչ դերասանը, հետո աշխատել ենք դերի վրա և ունեցել ենք հրաշալի արդյունք»:
Ամբողջական նյութը՝
https://www.tert.am/life/am/news/2024/09/26/Depi-jambar/95402?fbclid=IwZXh0bgNhZW0CMTAAAR1a2ubrKfuAIelZS8AWyRGIIR3rnyNg6gB_-Dl4Ex-k7Bok9zc0Xf-6uO8_aem_QcHf932dH4HbvxeJLYBEhg
