ՀՀ Կոտայքի մարզում հնարավոր հրդեհների կանխարգելման, հողային ռեսուրսների պահպանման և շրջակա միջավայրի պաշտպանության նպատակով ՀՀ ՆԳՆ ՓԾ Կոտայքի մարզային փրկարարական վարչությունը կոչ է անում խստորեն պահպանել հրդեհային անվտանգության կանոները, զերծ մնալ դաշտերի և այգիների այրելուց, խարույկներ չվառել չնախատեսված վայրերում և չթողնել դրանք առանց հսկողության:
Ստորև ներկայացվում է հրդեհների կանխարգելման և շրջակա միջավայրի պաշտպանության կարևորությունը՝
Բերրիության կորուստ — Խոտի այրման ընթացքում հողի վերին շերտում գտնվող օրգանական նյութերը ոչնչանում են։ Այս նյութերը հանդիսանում են հիմնական պարարտանյութ, որոնք ապահովում են հողի բերրիությունը։ Օրգանական նյութերի կորուստը երկարաժամկետ վնաս է հասցնում հողի բնական վերականգնման ունակությանը։ Օգտակար միկրոօրգանիզմների ոչնչացում — Հողի բերրիությունը կախված է ոչ միայն սննդանյութերից, այլև միկրոօրգանիզմներից։ Դրանք նպաստում են սննդանյութերի շրջանառությանը, բույսերի աճին և հողի առողջությանը։ Խոտի այրումը վերացնում է այս օգտակար միկրոօրգանիզմների մեծ մասը։ Հողի կառուցվածքի վնասում — Այրման արդյունքում հողը կորցնում է իր բնական խոնավությունը և դառնում խոցելի էրոզիայի հանդեպ։ Սա նշանակում է, որ քամին և անձրևաջրերը կարող են հեշտությամբ քայքայել հողի շերտը՝ նվազեցնելով նրա բերրիությունը։ Սննդանյութերի կորուստ — Խոտի այրման ժամանակ ազոտը և այլ սննդանյութերը դուրս են գալիս մթնոլորտ՝ գազային վիճակում, ինչը բերում է սննդանյութերի հավասարակշռության խախտմանը հողի մեջ։ Նպաստում կլիմայական փոփոխություններին -Վառման ընթացքում արտանետվող ածխաթթու գազը ոչ միայն աղտոտում է օդը, այլև նպաստում է գլոբալ տաքացմանը, ինչը երկարաժամկետ վնաս է ինչպես բնությանը, այնպես էլ գյուղատնտեսությանը։
Կոչ՝ զերծ մնալ խոտի այրումից:Հարգելի համաքաղաքացիներ, մեր հողը մեր կյանքի աղբյուրն է։
Այն ապահովում է մեր սնունդը, մեր առողջությունը և մեր սերունդների ապագան։ Խոտի այրումը կործանարար ազդեցություն ունի հողի վրա և երկար տարիների ընթացքում կարող է ամբողջովին զրկել այն բերրիությունից։
