Սև կոստյումով, առանց խաչ կրծքանշանի և բարձր տրամադրությամբ Գյումրու նախկին քաղաքապետ Վարդա Ղուկասյանը, ով 13 տարի անց կրկին նույն աթոռին է, երդմնակալությամբ ստանձնեց պաշտոնը:
Շիրակի թեմի առաջնորդ Միքայել արքեպիսկոպոս Աջապահյանն «Հայր մեր»-ն ասաց, այնուհետ հնչեց ՀՀ օրհներգը:
Վարդան Ղուկասյանը մոտեցավ ամբիոնին և երդվեց իր պարտավորություններն իրականացնելիս պահպանել ՀՀ սահմանադրությունն ու օրենքները, համայնքի ավագանու որոշումները:
«Ազնվորեն և բարեխղճորեն կատարել համայնքի ղեկավարի լիազորությունները: Ծառայել քաղաքի բարգավաճմանը, գործել ի բարօրություն բնակիչների: Պարտավորվում եմ պաշտպանել քաղաքի իրավունքները, օրինական շահերը և սեփականությունը:
Ուժերիս անմնացորդ նվիրումով սատարել ժողովրդիս հավատին, նպաստել նրա նյութական և հոգևոր վերելքին»,- ասաց Վարդան Ղուկասյանը:
Այնուհետ Վարդան Ղուկասյանին հանձնվեցին խորհրդանիշեր լանջաշղթան և բանալին:
Երդմնակալության արարողությանը ներկա չէին «Քաղաքացիական պայմանագիր» և «Մեր քաղաքը» խմբակցությունները:
«Կոմունիստական կուսակցություն» խմբակցության թեկնածու Վարդան Ղուկասյանը ապրիլի 16-ի Գյումրու ավագանու առաջին նիստում 18 կողմ, 0 դեմ ձայնով ընտրվել էր համայնքի նոր ղեկավար:
Հիշեցնենք՝ Գյումրու ՏԻՄ ընտրությունների արդյունքների ամփոփմամբ՝ պարզ էր դարձել, որ որևէ քաղաքական ուժի չի հաջողվել հավաքել 50+1 տոկոս անհրաժեշտ քվեները, և առանց դաշինքներ ու կոալիցիաներ կազմելու՝ հնարավոր չէր լինելու ստանձնել քաղաքի կառավարումը:
Արդյունքների ամփոփումից հետո «Մայր Հայաստան» դաշինքը հայտարարել է, որ պատրաստ է իր ձայնը տալու առավելագույն քվեներ ստացած ընդդիմադիր ուժին՝ Վարդան Ղուկասյանին:
«Իմ հզոր համայնք» կուսակցության Գյումրի համայնքի ավագանու ցուցակի քաղաքապետի թեկնածու Ռուբեն Մխիթարյանն էլ իր հերթին է հայտարարել, որ պատրաստ է ավագանու կազմով քվեարկել Վարդան Ղուկասյանի օգտին։
Մի քանի օր անց «Մեր քաղաքը» դաշինքը ևս, ի դեմս Մարտուն Գրիգորյանի, հայտարարություն տարածեց՝ հայտնելով, որ կտա անհրաժեշտ քանակությամբ քվե Վարդան Ղուկասյանին:
Հայտնել էինք նաև, որ Մարտուն Գրիգորյանն ինքնաբացարկի դիմում էր ներկայացրել և հրաժարվել Գյումրու ավագանու մանդատից:
