Բանկային շահագործումն ու դրա կործանարար հետևանքները

«ԴԵՄ ԵՄ» ՔԱՂԱՔԱՑԻԱԿԱՆ ՇԱՐԺՄԱՆ ՔԱՂԱՔԱԿԱՆ ԿՈՉԸ ՀՀ ԻՇԽԱՆՈՒԹՅՈՒՆՆԵՐԻՆ

Քաղաքացիների բանկային շահագործումն ու դրա կործանարար հետևանքները՝ արտագաղթ

Հայաստանի Հանրապետության օրվա իշխանություններ

Այսօր հազարավոր հայ քաղաքացիներ ապրում են վարկային սարսափի իրականության մեջ։ Մենք այլևս չենք կարող լռել, երբ բանկային տոկոսադրույքներն, իբրև «նորմալ շուկայական գործիք», վերածվել են ժողովրդի տնտեսական բնաջնջման մեխանիզմի։

Հայաստանի վարկային միջավայրում՝

սպառողական վարկերը հասնում են 14% – 19%-ի,

հիփոթեքային վարկերը՝ 10% – 12%,

և կան բազմաթիվ դեպքեր, երբ տոկոսները գերազանցում են 20%-ը։

Մինչ ձեր կառավարության ներկայացուցիչները հնչեցնում են «բարեփոխումների», «տնտեսական աճի», «գործազրկության նվազման» թվեր, մեր քաղաքացին խեղդվում է՝ անընդհատ աճող տոկոսադրույքների ճիրաններում։

Այո՛, դուք դա թույլ եք տալիս։

Դուք՝ որպես իշխանություն, ձեր լռությամբ հավանություն եք տալիս, որ ՀՀ քաղաքացին՝ իր տունը գրավ դրած, իր արժանապատվությունը մի կողմ դրած, վերջում կորցնի ամեն ինչ։

Դուք պատասխանատու եք, որ քաղաքացին այսօր վտարվում է իր տանից՝ ոչ թե թշնամու կողմից, այլ բանկի կատարածուի ձեռքով։

Ի՞նչ է սա, եթե ոչ պետության ոչ պատշաճ մշակված քաղաքականություն։

Որտե՞ղ է պետությունը, երբ մարդն այլևս անկարող է մարել վարկը։

Որտե՞ղ եք դուք, երբ նա, սրտաճմլիկ վիճակում, վերցնում է իր ընտանիքը և լքում է երկիրը՝ խուսափելու «սեփական հայրենիքում» ընչազուրկ դառնալ։

Համաշխարհային համեմատություն՝ միջին տարեկան տոկոսադրույքներ

Երկիր Սպառողական վարկ Հիփոթեքային վարկ

Գերմանիա 3% – 5% 2% – 3.5%

Ֆրանսիա 3% – 5% 2.5% – 3.5%

Ճապոնիա 0.5% – 2% 1% – 2%

Նիդեռլանդներ 3% – 4% 2.5% – 3%

Չեխիա 4% – 5% 3.5% – 4.5%

Լեհաստան 6% – 8% 5% – 6.5%

Հայաստանում այդ թվերը 1.5x-ից մինչև 5x անգամ բարձր են, ինչը նշանակում է՝

քաղաքացու եկամուտը գրավադրվում է,

ապագան՝ տոկոսների տակ հալվում,

իսկ տունը՝ բռնագանձման վտանգի տակ։

Եվ ինչ է լինում վերջում՝ արտագաղթ։

Վարկային տոկոսադրույքներն այսօր Հայաստանում դարձել են արտագաղթի իրական պատճառ։

Մեր պահանջներն են՝

ՀՀ կառավարությունն ու Կենտրոնական բանկը սահմանեն օրենքով վարկերի տոկոսադրույքների վերին շեմ՝ ոչ ավելի, քան 8% սպառողականի, և 6% հիփոթեքայինի համար։

Մշակվի վարկային ճգնաժամի ենթարկված քաղաքացիների սոցիալական պաշտպանության ծրագիր։

Սահմանվի կարգ, ըստ որի՝ առաջնահերթ է համարվում քաղաքացու սեփականության պաշտպանությունը, ոչ թե բանկի շահը։

Սկսվի համապարփակ ուսումնասիրություն՝ պարզելու, թե քանի ընտանիք է բռնագանձման արդյունքում արտագաղթել Հայաստանից։

«ԴԵՄ ԵՄ» շարժումը հայտարարում է.

Մենք չենք լռելու։ Մեր ժողովուրդը արժանի է ապրել մի երկրում, որտեղ պետությունը պաշտպանում է իր քաղաքացուն՝ ոչ թե լուռ հետևում նրա կործանմանը։ Եթե այս իրականությունը ձեզ չի հուզում, ուրեմն դուք այլևս չունեք բարոյական իրավունք խոսելու ժողովրդավարությունից կամ արդարությունից։

Հ․Գ․ Չկա պառլամենտական ըդիմություն, որ այս խնդիրը բերի օրակարգ․․․.

Վանիկ Նիկոյան

«ԴԵՄ ԵՄ» Քաղաքացիական Շարժման նախագահ