Ամերիկյան վարչակազմը կապ կպահպանի Հնդկաստանի և Պակիստանի ղեկավարության հետ՝ նպատակ ունենալով լուծել երկկողմ հակամարտությունը։
Այս մասին «X»-ի միկրոբլոգում հայտնել է ԱՄՆ պետքարտուղար Մարկո Ռուբիոն։
Նա ընդգծել է, որ «ուշադրությամբ հետևում է Հնդկաստանի և Պակիստանի միջև տիրող իրավիճակին»։
Պետքարտուղարի խոսքով՝ Միացյալ Նահանգները «կշարունակի ներգրավվել Հնդկաստանի և Պակիստանի ղեկավարության հետ՝ խաղաղ լուծում գտնելու համար»։
ԱՄՆ նախագահ Դոնալդ Թրամփը, հիշեցնենք, հույս է հայտնել, որ Հնդկաստանի և Պակիստանի միջև հակամարտությունն արագ կավարտվի։
Մայիսի 7-ի գիշերը Հնդկաստանը հարվածներ է հասցրել Պակիստանին և Պակիստանի կողմից վերահսկվող Քաշմիրի շրջաններին։ Հնդկաստանի բանակը հայտարարել է «Սինդուր» գործողության մեկնարկի մասին, որի թիրախում «Պակիստանի ահաբեկչական ենթակառուցվածքներն են»։
Պակիստանը պատասխանել է փոխադարձ հարվածներով, 48 ժամով փակել է իր օդային տարածքը և կործանիչներն օդ է հանել։ 2 կողմում կան տուժածներ և զոհեր:
Այս սրումը տեղի է ունեցել այն բանից հետո, երբ Հնդկաստանը Իսլամաբադին մեղադրել է ապրիլի վերջին հնդկական հողում զբոսաշրջիկների վրա կատարված ահաբեկչությանը աջակցելու մեջ, որի հետևանքով զոհվել էր 26 մարդ:
