Վրաստանում ընդդիմության առաջնորդներից մեկի՝ «Հանուն փոփոխությունների կոալիցիայի» առաջնորդներից Զուրաբ Ջափարիձեի խափանման միջոցը փոխարինվել է կալանքով։
Որոշումը կայացրել է Թբիլիսիի քաղաքային դատարանը։ Ջափարիձեին ձերբակալել են հենց դատարանի դահլիճում։
Խափանման միջոցը փոխելու պատճառ է հանդիսացել գրավը չվճարելը։
Ապրիլի 16-ին խորհրդարանի ժամանակավոր քննչական հանձնաժողովի նիստին չներկայանալու պատճառով Զուրաբ Ջափարիձեի նկատմամբ խափանման միջոց է ընտրվել 20 հազար լարիի չափով գրավը։ Ջափարիձեի գրավի ժամկետը լրացել է մայիսի 18-ին։
Ժամանակավոր քննչական հանձնաժողովի բողոքի հիման վրա դատախազությունը Ջափարիձեին մեղադրանք է առաջադրել Քրեական օրենսգրքի 349-րդ հոդվածով՝ «Վրաստանի խորհրդարանի ժամանակավոր քննչական հանձնաժողովի պահանջը չկատարելը», որը պատժվում է տուգանքով կամ ազատազրկմամբ՝ մինչև մեկ տարի ժամկետով կամ մինչև երեք տարի պաշտոնավարելու իրավունքից զրկելով։
