Տագնապային խանգարումները հոգեկան առողջական խնդիրների խումբ է, որոնց բնորոշ է իրավիճակին անհամապատասխան տագնապի, անհանգստության զգացումը: Այս մասին հայտնում է ՀՀ առողջապահության նախարարությունը՝ վկայակոչելով հոգեբուժության և բժշկական հոգեբանության գծով ԱՆ խորհրդատու Գևորգ Փաշիկյանին։
Տագնապը կարող է դրսևորվել ՝
- անհանգստության, անորոշ, ոչ հստակ վախի զգացողությամբ,
- մարմնական դրսևորումներով՝ սրտխփոց, շնչառության դժվարություն, դող, մկանների ձգվածություն, քրտնարտադրություն, զարկերակային ճնշման տատանումներով,
- տագնապային մտքերով՝ «ես մահանում եմ, սիրտս կանգնելու է հիմա», «ես խելագարավում եմ»,«չեմ կարողանա ինձ վերահսկել»,
- շրջապատի անիրականության զգացողությամբ՝ «կարծես օդի մեջ լինեմ», «կարծես ամեն ինչ շուրջս լողա»:
Կախված այս ախտանշանների տևողությունից, առաջացման պատճառից, իրավիճակից` կարող է ախտորոշվել տարբեր տիպի տագնապային խանգարում:
Օրինակ`
- եթե տագնապի զգացողությունը առաջանում է հանկարծակի, զուգակցվում է արտահայտված մարմնական դրսևուրումներով, տևում ոչ երկար ժամանակ, ապա խոսում ենք «Խուճապային խանգարման» մասին (տագնապային գրոհ):
- եթե տագնապի զգացողությունը առկա է ամբողջ օրվա ընթացում, տարածվում է կյանքի բոլոր ոլորտներում, ապա անձն ունի «Ընդհանրացված տագնապային խանգարում»:
Տագնապային խանգարման գրագետ և բազմակողմանի վարման դեպքում հնարավոր է հասնել առողջացման և վարել լիարժեք, ակտիվ կյանք:
Ախտանշանների առկայության դեպքում պետք է դիմել համապատասխան մասնագետի՝ հոգեբույժի, հոգեթերապևտի:
