ՀՀ ՊՆ Ն զորամասի պայմանագրային զինծառայող, կին զինծառայող Հ.Ա.-ին մեղադրանք է առաջադրվել ՀՀ քրեական օրենսգրքի 524-րդ հոդվածի 2-րդ մասի 1-ին կետով՝ ստորադասի կողմից հրամանատարի նկատմամբ վիրավորանք հասցնելու համար։ Մեղադրյալը 2024 թվականի դեկտեմբերի 6-ին այլ զինծառայողների ներկայությամբ իր ուղղակի պետ փոխգնդապետ Ռ.Ս.-ի հասցեին հնչեցրել է վիրավորանք պարունակող արտահայտություն՝ նվաստացնելով վերջինիս պատիվն ու արժանապատվությունը։ Գործը դատարան է ուղարկվել 2025 թվականի մայիսի 8-ին։ Այս մասին Iravaban.net–ը տեղեկանում է Datalex դատական տեղեկատվական համակարգից։
Դեպքի հանգամանքները
2024 թվականի դեկտեմբերի 6-ին, ժամը 10:00-ի սահմաններում, ՀՀ ՊՆ Ն զորամասի Ն դիվիզիոնի հրամանատարական կետում այլ զինծառայողների ներկայությամբ Հ.Ա.-ն՝ հանդիսանալով նույն զորամասի պայմանագրային զինծառայող, Ն դիվիզիոնի պլանշետավար-ռադիոհեռախոսավար, կոչումով շարքային, իր ուղղակի պետ՝ Ն դիվիզիոնի հրամանատար, փոխգնդապետ Ռ.Ս.-ի հասցեին հնչեցրել է հետևյալ վիրավորանք պարունակող արտահայտությունը՝ «Կամանդիրն աչքիս ուզում է, որ վերևից իր հետույքին ձեռ տան՝ նոր հասկանա, թե ում հետ գործ ունի»։
Մեղադրանքը
Հ.Ա.-ին մեղադրանք է առաջադրվել ՀՀ քրեական օրենսգրքի 524-րդ հոդվածի 2-րդ մասի 1-ին կետով՝ զինծառայողին վիրավորանք հասցնելը, որը կատարվել է ստորադասի (ենթակայի) կողմից հրամանատարի (պետի) նկատմամբ։
Iravaban.net–ը ստորև ներկայացնում է 524-րդ հոդվածի իրավակարգավորումները.
ՀՀ ՔՕ 524-րդ հոդված. Զինծառայողին վիրավորանք հասցնելը
Հոդվածի 1-ին մասը նախատեսում է պատասխանատվություն զորամասում կամ զինվորական ծառայություն կրելու այլ վայրում զինծառայողին վիրավորանք հասցնելու՝ զինծառայողի պատիվն ու արժանապատվությունը նվաստացնելու համար։
Հոդվածի 2-րդ մասի 1-ին կետը նախատեսում է ավելի խիստ պատասխանատվություն, երբ նույն արարքը կատարվում է ստորադասի (ենթակայի) կողմից հրամանատարի (պետի) նկատմամբ։
Նախատեսված պատիժը՝
- զինվորական ծառայության մեջ սահմանափակում՝ մեկից երկու տարի ժամկետով, կամ
- կարճաժամկետ ազատազրկում՝ մեկից երկու ամիս ժամկետով, կամ
- կարգապահական գումարտակում պահել՝ առավելագույնը երկու տարի ժամկետով, կամ
- Ազատազրկում՝ առավելագույնը երկու տարի ժամկետով։
Խափանման միջոցը
Հ.Ա.-ի նկատմամբ որպես խափանման միջոց է ընտրվել բացակայելու արգելքը։
Գործի դատական քննության ընթացքը
Գործը 2025 թվականի մայիսի 8-ին ՀՀ Կոտայքի մարզի դատախազությունից ուղարկվել է Կոտայքի մարզի առաջին ատյանի ընդհանուր իրավասության դատարան։ Մայիսի 15-ին գործը մուտքագրվել և մակագրվել է դատավոր Գագիկ Հարությունյանին։
Դատավորը 2025 թվականի մայիսի 19-ին որոշում է կայացրել քրեական գործի վարույթը ստանձնելու և նախնական դատալսումներ նշանակելու մասին։
Նախնական դատալսումների նշանակումները և չկայացած դատական նիստերը՝
- 2025 թվականի հունիսի 3-ին նախնական դատալսումները չեն կայացել դատավարության մասնակիցների պատշաճ ծանուցման վերաբերյալ ապացույցների բացակայության պատճառով։
- 2025 թվականի սեպտեմբերի 29-ին նախնական դատալսումները չեն կայացել դատավորի՝ արձակուրդում գտնվելու պատճառով։
- 2025 թվականի դեկտեմբերի 18-ին նախնական դատալսումներն ու նշանակված են ժամը 17:00-ին Կոտայքի մարզի առաջին ատյանի ընդհանուր իրավասության դատարանի Աբովյանի նստավայրի թիվ 3 դահլիճում։
Գործի առանձնահատկությունը
Սույն գործը նշանակալի է այն առումով, որ մեղադրյալը կին զինծառայող է՝ պայմանագրային հիմունքներով ծառայող ՀՀ ՊՆ զորամասում, ինչը համեմատաբար հազվադեպ դեպք է զինվորական քրեական գործերի համատեքստում, – տեղեկացնում է Iravaban.net–ը։
Ծանուցում 1. Հանցագործության համար մեղադրվողը համարվում է անմեղ, քանի դեռ նրա մեղավորությունը չի ապացուցվել օրենքով սահմանված կարգով՝ դատարանի՝ օրինական ուժի մեջ մտած դատավճռով։
Ծանուցում 2. Սույն նյութի լուսանկարը պատկերում է կին զինծառայողի՝ չհանդիսանալով գործով մեղադրյալի լուսանկարը։
