Ընդմիջումից հետո շարունակվում է շինծու մեղադրանքներով Մեշալի գյուղում ցեղասպանություն իրականացնելու մեջ մեղադրվող Վագիֆ Խաչատրյանի քրեական գործով դատավարությունը:
Բաքվի զինվորական դատարանի դատավոր Զեյնալ Աղաևի նախագահությամբ տեղի ունեցած դատական նիստում ելույթ է ունեցել Խաչատրյանի փաստաբան Ռադմիլա Աբիլովան, ով իր ելույթում, պահելվ զուտ ձևական կողմը, խնդրել է արդարացնել Վագիֆ Խաչատրյանին։
Այնուհետև վերջին խոսքի իրավունք է տրվել դատական այս ֆարս հետևանքով մեղադրյալի աթոռին հայտնված Խաչատրյանին:
Նա նշել է, որ ամբողջ դատավարության ընթացքում ինչպես պնդել է, հիմա էլ հաստատում է՝ իրեն մեղավոր չի ճանաչում և դատարանին խնդրել է արդարացնել իրեն:
Դատավորները անցել են խորհրդակցական սենյակ՝ դատավճիռը կազմելու, այնուհետ հրապարակելու համար:
Ինչպես հայտնել ենք, Բաքվում շարունակվում է Խոջալուի շրջանի Մեշալի գյուղում ապօրինի հայկական զինված կազմավորումների կազմում ցեղասպանություն իրականացնելու համար կեղծ և շինծու մեղադրանքով անցնող Վագիֆ Խաչատրյանի քրեական գործով հերթական դատական նիստը:
Բաքվի զինվորական դատարանում տեղի ունեցած դատավարության ժամանակ դատախազը հանդես է եկել մեղադրական ճառով՝ պահանջելով Վագիֆ Խաչատրյանին 15 տարի ժամկետով զրկել ազատությունից։
Դատախազն իր ճառում հայտարարել է, որ Վագիֆ Խաչատրյանն իր պատժի առաջին 5 տարին պետք է անցկացնի բանտում, իսկ մնացածը՝ խիստ ռեժիմի գաղութում։
Արցախցի 68-ամյա տղամարդը առևանգվել էր Լաչինի միջանցքից ամռանը, երբ փորձել էր Կարմիր խաչի միջազգային կոմիտեի ուղեկցությամբ Հայաստան տեղափոխվել բուժման նպատակով։
Առևանգված Վագիֆ Խաչատրյանի դեպքով Ադրբեջանի նկատմամբ միջանկյալ միջոց կիրառելու պահանջ է ներկայացվել Մարդու իրավունքների եվրոպական դատարան:
Ադրբեջանը Խաչատրյանին մեղադրում է 1991 թվականին տեղի ունեցած «Մեշալիի հանցագործության» համար՝ հայտարարելով, թե վերջինս «զինված խմբավորում» է գլխավորել և «ցեղասպանություն» իրականացրել:
Նախորդ բոլոր դատական նիստերի ժամանակ Խաչատրյանը կտրականապես հերքել էր իրեն ուղղված մեղադրանքները՝ նշելով, որ ճանաչում է իր դեմ ցուցմունք տված անձանցից շատերի ընտանիքներին, հատկապես՝ նրանց ծնողներին, մտերիմ հարաբերություններ է ունեցել շատերի հետ, սակայն 1991 թվականին Մեշալիում տեղի ունեցած իրադարձություններին ինքը ներկա չի եղել և չի ընդունում իրեն ուղղված մեղադրանքները:
