Այսօր՝ Երևանի քաղաքապետարանի գործակարգավարական նիստի ժամանակ քաղաքապետի տեղակալ Սուրեն Գրիգորյանը տեղեկացրեց, որ բոլոր ավտոբուսների վրա տեղադրվել են համապատասխան սարքեր՝ ալիդատորներ, դրանք կտեղադրվեն նաև տրոլեյբուսների վրա:
«Դրանք տեղադրված են նաև մետրոյի բոլոր կայարաններում՝ երկուական անցարգելների վրա։ Բոլորը չենք կահավորվում, որովհետև բոլոր կայարաններում նոր անցարգելներ ենք ունենալու, և դրանք հագեցած կլինեն սարքերով»,- ասաց նա:
Քաղաքապետ Տիգրան Ավինյանը արձագանքելով ասաց, որ այս հանձնարարականը կարելի համարել կատարված և շատ կարևոր է, այդ սարքերը և QR կոդերը փորձարկել մինչև ամբողջական նոր տոմսային համակարգի անցնելը:
«Հաջորդ տարվանից Երևանում գործելու է տոմսային համակարգի ամբողջովին նոր տրամաբանություն, ունենալու ենք տոմսային նոր պրոդուկտներ՝ օրական, շաբաթական, ամսական կամ տարեկան տոմսեր, կգործեն տարատեսակ սակագներով, և կարևոր է, որ մինչև այդ պրոդուկտին անցնելը՝ փորձարկենք համակարգն ու վստահ լինենք, որ բոլոր խնդիրները, որոնց մասին հիմա քաղաքացիները ահազանգում են, լուծված են, և անցումը կլինի ավելի սահուն ու հանգիստ: Հաջորդ տարի հանրային տրանսպորտի շարժակազմը շարունակում ենք համալրել ևս 200 նոր ավտոբուսով և բոլոր այդ փոփոխությունները մեկ ընդհանուր տրամաբանությնա մաս են՝ հանրային տրանսպորտն այս քաղաքում ունի առաջնահերթություն, դրան է տրվելու առաջնահերթությունը, և տրանսպորտից օգտվող մարդու համար ապահովելու ենք լավագույն պայմանները»,- նշեց Ավինյանը:
