Այսօր՝ հունվարի 9-ին, ավտոմեքենայում հրդեհ է տեղի ունեցել Արմավիրի մարզում: Ժամը 17:50-ի սահմաններում ՀՀ Ներքին գործերի նախարարության Փրկարար ծառայության 9-11 ճգնաժամային կառավարման ազգային կենտրոն ահազանգ է ստացվել, որ Վաղարշապատ-Երևան ավտոճանապարհին՝ Մանուշյան փողոցում՝ ժողովրդին հայտնի Զվարթնոց թաղամասում, ավտոմեքենա է այրվում:
Ինչպես հայտնում է ֆոտոլրագրող Գագիկ Շամշյանը, նմանատիպ ահազանգ էլ եղել է նաև ՀՀ ՆԳՆ ոստիկանության Պարեկային ծառայության Արմավիրի մարզի գումարտակում:
Օպերատիվորեն ժամանել են ՊԾ Արմավիրի մարզի գումարտակի 1-ին վաշտի 1-ին դասակի ավագ պարեկ Դավիթ Առաքելյանն ու կրտսեր պարեկ Արամ Մելքոնյանը:
ժամանել են նաև նույն վաշտի հրամանատար Արսեն Բաղդասարյանը, դասակի հրամանատար Կարեն Մանուկյանն ու գումարտակի ծառայության ավագ տեսուչ Արթուր Խաչատրյանը:
Օպերատիվորեն ժամանել են նաև Վաղարշապատի հրշեջ-փրկարարական ջոկատից 1 մարտական հաշվարկ:
Մինչ հրշեջների ժամանումը՝ վառվող Chevrolet մակնիշի ավտոմեքենայում առաջացած կրակի տարածման դեմ պայքարել է վարորդը՝ Արմավիրի մարզի բնակիչ 27-ամյա Սարգիս Թամրազյանը, քաղաքացիներն ու պարեկները, ապա ժամանած հրշեջները մարել են կրակը:
Ըստ նախնական տեղեկությունների, բարեբախտաբար, տուժածներ չկան:
Հրշեջների ժամանումից հետո ավագ պարեկ Դ. Առաքելյանն ու կրտսեր պարեկ Ա. Մելքոնյանը սահմանազատել են տարածքը, դեպքի վայրից հեռացրել հետաքրքրացեր քաղաքացիներին, որպեսզի հրշեջները առանց խոչընդոտի կարողանան աշխատել:
Ժամանել են նաև ՀՀ ՆԳՆ ոստիկանության Վաղարշապատի բաժնի հերթապահ խումբը՝ օրվա պատասխանատու հերթապահի գլխավորությամբ:
Լուսանկարները՝ Դավիթ Հայրապետյանի
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։
© https://shamshyan.com/hy/article/2024/01/09/1253444
