Անկարան ջանքեր է գործադրում Ադրբեջանի և Հայաստանի միջև խաղաղություն հաստատելու համար։
Այս մասին Թուրքիայի նախագահ Ռեջեփ Թայիփ Էրդողանն ասել է Նյու Յորքում (ԱՄՆ) Թուրքիայի տանը լրագրողների հետ զրույցում:
«Դատելով Փաշինյանի մոտեցումից՝ նա չունի որևէ բացասական վերաբերմունք: Մեզնից պահանջվում է Հայաստանի և Ադրբեջանի միջև հարաբերությունների հարցում ջանք, որպեսզի նրանք կարողանան ապրել որպես հարևաններ»,- ընդգծել է Թուրքիայի նախագահը։
Էրդողանը վստահություն է հայտնել, որ Ադրբեջանի և Հայաստանի միջև մի շարք հարցեր կլուծվեն:
«Հուսով եմ, որ մենք կարող ենք քայլ առ քայլ լուծել այդ հարցերը երկու կողմերն էլ այս պահին ակնկալում են խաղաղություն և ջանքեր գործադրում, որ ստեղծված խաղաղ և հանգիստ միջավայրը կլինի լավագույն լուծումը բոլորի համար»,- նշել է Թուրքիայի նախագահը։
Էրդողանի խոսքով՝ Հայաստանի և Ադրբեջանի միջև խաղաղությունը նոր հնարավորություններ կբացի երկու երկրների համար։ Նա նաև հավելել է, որ խաղաղ գործընթացի արդյունքը դրական ազդեցություն կունենա Թուրքիայի և Հայաստանի միջև հարաբերությունների կարգավորման վրա։
«Եթե դիտարկենք հարգելի Փաշինյանի մոտեցումները, ապա բացասական միտում չենք տեսնում։ Նրանք մեզանից՝ Թուրքիայից, ակնկալում են աջակցություն Հայաստանի և Ադրբեջանի միջև խաղաղության պայմանագրի կնքման հարցում, բարիդրացիություն հաստատելու հարցում։ Մենք էլ այդ նպատակն ենք հետապնդում և ջանքեր ենք գործադրում այդ ուղղությամբ»,- ասել է Էրդողանը՝ հավելելով, որ Ադրբեջանը ևս խաղաղություն է ցանկանում։
Հիշեցնենք՝ ՄԱԿ-ի Գլխավոր վեհաժողովի 79-րդ նստաշրջանի շրջանակում տեղի է ունեցել Հայաստանի վարչապետ Նիկոլ Փաշինյանի և Թուրքիայի նախագահ Ռեջեփ Թայիփ Էրդողանի հանդիպումը: Զրուցակիցները մանրամասն անդրադարձ են կատարել Հայաստան-Թուրքիա հարաբերությունների կարգավորման գործընթացի շրջանակներում արդեն իսկ կատարված քայլերին և առկա պայմանավորվածություններին:
