ՙ Նմանակը՚ վեպը գրող, լրագրող Աշոտ Աղաբաբյանի 11-րդ գիրքն է. հետախուզության համաշխարհային պատմության մեջ նմանը չունեցող բացառիկ օպերացիայի մասին գրվում է առաջին անգամ: Գեղարվեստական վեպի գլխավոր հերոսի նախատիպը ծնունդով Իջեւանի շրջանի Աչաջուր գյուղի ԽՍՀՄ հետախույզ Սմբատ Խոջոյանն է: Թուրքիայի խորհրդարանի իշխող կուսակցության պատգամավոր Մահմուդ Շովքեթի նմանակ հայ հետախույզին ԽՍՀՄ գլխավոր հետախուզական վարչությունը գործուղում է Ստամբուլ` թուրք պատգամավորին, այսպես կոչված, փոխարինելու: Գաղտնիության պայմաններում մահացած ու թաղված պատգամավորի փոխարեն նրա նմանակ հայ հետախույզը մոտ երեք տարի աշխատում է խորհրդարանում` մինչեւ բացահայտվելը, որից հետո լքում է երկիրը: Հասկանալի պատճառով թուրք պատգամավորի, որոշ գործող անձանց անունները փոխված են:
Փաստերին ու ճշմարտացի դեպքերին Աշոտ Աղաբաբյանը նախընտրել է անդրադառնալ գեղարվեստական վեպի միջոցով:
Գլխավոր հերոսի աղջիկը եւ թոռը Լեհաստանից գալու են եւ մասնակցելու են գրքի շնորհանդեսին, որը տեղի է ունենալու Երեւանում, ՙԷլիտ Պլազա՚ կենտրոնում, նոյեմբերի 28-ին, ժամը 18.30-ին:
Աշոտ Աղաբաբյանն ասում է, որ ինքը գրում է այն բաների մասին, որոնց մասին անհրաժեշտ է բարձրաձայնել, եւ որոնք պետք են մեր պետության կայացման համար:
ՙՉնայած 70 տարվա պատմության դրվագներ եմ ներկայացնում, սակայն ես իմ վեպերում գրում եմ այն ամենի մասին, որոնք չեն գրվել նախկինում, սակայն արդիական են: <Սեւ հովազ>-ներում ներկայացված հերոսները մեր ժողովրդից թաքցված արժանի զավակներն են, որոնց վերադարձնում եմ ժողովրդին` իրենց ողջ պատմությամբ՚,- lragrogh.com-ի հետ զրույցում նշեց Աշոտ Աղաբաբյանը:
Թագուհի Հակոբյան
