Պոլսահայ բանաստեղծ Զահրատի 100-ամյակի առթիվ Երեւանի Հայ արտ մշակութային կենտրոնում դեկտեմբերի 6-ին բացվեց Լեւոն Գյուլխասյանի գծանկարների ցուցահանդեսը:
« Երեւանի քաղաքապետարանի նախաձեռնությունն է, բոլոր հայտնի մարդկանց հոբելյանները նշում են, մենք էլ («Ֆակտում » փաստագրական կենտրոնը) դիմեցինք, որ ցուցահանդես բացենք, ընդառաջեցին, ֆինանսավորեցին: Գաղափարը հետեւյալն էր` ներկայացնել Զահրատի բանաստեղծությունները, որ մարդիկ գան ցուցահանդես, կարդան, նաեւ` գրաֆիկական լուծումներ տանք: Լեւոն Գյուլխասյանը գծանկարներն արեց, Գրականության եւ արվեստի թանգարանը ձեռագրեր տրամադրեց, գրքի շապիկներ, եւ ցուցահանդեսը բացեցինք »,- lragrogh.com-ի հետ զրույցում նշեց հրապարակախոս Տիգրան Պասկեւիչյանը:
Հոկտեմբերի վերջին Տիգրան Պասկեւիչյանը եղել է Ստամբուլում: Այնտեղ նա հանդիպել է հայ նկարիչ Օհաննես Շաշքալին, որը հրատարակել է Զահրատի գիրքը` հայերեն եւ թուրքերեն: Շաշքալն օգնել է Պասկեւիչյանին, լուսանկարներ տրամադրել: Նա ծանոթացել է նաեւ Զահրատի երկհատորյակի խմբագրի` Արտաշես Մարկոսյանի հետ:
Պոլսի «Ժամանակ» օրաթերթի գլխավոր խմբագիր Արա Գոչունյանը հիշում է, որ Զահրատի առաջին բանաստեղծությունը տպագրել է «Ժամանակ» օրաթերթը:
« Զահրատը այն բանաստեղծն է, որի թողած ավանդը կարողանում է նոր ժամանակների մեջ թարմանալ եւ նոր ժամանակների մեջ մարդկանց նոր ներշնչանքի, նոր մտահղացումների առիթ դառնալ: Ներկա ժամանակաշրջանին, երբ մարդկությունը գրավոր մշակույթից հետզհետե հեռանում է, պատկերավոր ասած, շարքային տառաճանաչ մարդ Զահրատի խաթեր կարող է բանաստեղծության հետ շփումը հանձն առնել: Զահրատը ընթերցողի ներաշխարհի ներթափանցելու կարողության եւ վկայության մասին բավարար վկայություն է »,- մեզ հետ զրույցում ասաց Արա Գոչունյանը:
Չնայած Զահրատից մի քանի գրքեր են հրատարակվել տարբեր տարիներին, սակայն նրան ոչ բոլոր հայ ընթերցողներն են ծանոթ:
Ներաշխարհ
Չոր հացը բաժակ մը թէյի մեջ
թրջելու պես
Իր հոգերը կը թաթխէ
իր ներաշխարհին
Հոն ամէն ինչ գունագեղ է-համով-
Հոն հոգը կը դադրի հոգ ըլլալէ
ցաւը ցաւ ըլլալէ
-Ինքը բարի բարի կը ժպտի աշխարհին-
Իր չոր հացը կը համովնայ
բաժակ մը թէյին մեջ
Թագուհի Հակոբյան
