ԿԳՄՍ փոխնախարար Կարեն Գիլոյանն այսօր Աժ–ում իր ելույթի ժամանակ անդրադարձավ «Քաղաքացիական պայմանագիր» խմբակցության պատգամավոր Սիսակ Գաբրիելյանի դիտարկմանը, այն է՝ պետք է օր առաջ մտածել առնվազն 30 հազար նստատեղ ունեցող ֆուտբոլային մարզադաշտ ունենալու մասին։
Փոխնախարարը արձագանքեց․ «Դա հանապազօրյա խնդիր է, և Հայաստանի հավաքականի՝ հպարտություն ներշնչող խաղի ֆոնին այսօր այնպիսի պահանջարկ է առաջացել, որ ես ձեզ վստահեցնում եմ՝ հանրապետության կեսը, նույնիսկ պատգամավոր ինձնից նեղացած է այս պահին, որ տոմս չեմ կարողանում տալ, բայց ստադիոնի չափն է այդքան»:
Նա հույս հայտնեց, որ մի օր ՀՀ–ն կունենա այնպիսի մարզադաշտ, որտեղ կարձանագրվեն հայկական ֆուտբոլի նոր փառահեղ հաղթանակները։
Հիշեցնենք՝ այսօր ժամը 20։00–ին Հանրապետական մարզադաշտում ՀՀ–ն ընդունելու է աշխարհի բրոնզե մեդալակիր Խորվաթիայի հավաքականին՝ ԵՎՐՈ 2024–ի որակավորման փուլին պայքարելու համար։
