Ապրիլի 22-ին «Դինամո» մարզադահլիճում կայացել է ՆԳ նախարարություն-Գլխավոր դատախազություն ֆուտզալի եզրափակիչ հանդիպումը, որին ներկա էին ՆԳ նախարար Արփինե Սարգսյանը, Գլխավոր դատախազ Աննա Վարդապետյանը, ՆԳ նախարարության և ոստիկանության ղեկավար կազմը։
Համառ պայքարի արդյունքում հաղթողի կոչումը նվաճել է ՆԳ նախարարության հավաքական թիմը՝ 5-3 հաշվով հաղթելով Գլխավոր դատախազության հավաքական թիմին։
Ֆուտզալի առաջնությունում 3-րդ մրցանակային տեղը գրավել է Քննչական կոմիտեի հավաքական թիմը։
Ավարտին տեղի է ունեցել պարգևատրման հանդիսավոր արարողություն։
ՆԳ նախարարության հավաքական թիմին և մարզիչ, պաշտոնաթող գնդապետ Գագիկ Վարդանյանին մեդալներով ու դիպլոմներով պարգևատրել է Արփինե Սարգսյանը։
Մրցանակային տեղեր զբաղեցրած հավաքական թիմերն ու անհատական խաղով աչքի ընկած մասնակիցները ևս արժանացել են համապատասխան պարգևների։ Պարգևները հանձնել են ՆԳՆ ոստիկանության պետ-ՆԳ նախարարի տեղակալ Արամ Հովհաննիսյանը և ոստիկանության պետի տեղակալ Հայկ Բաբայանը։
Հանդիսավոր միջոցառման ավարտին ելույթ է ունեցել ՆԳ նախարար Արփինե Սարգսյանը՝ շնորհավորելով բոլորին և ընդգծելով, որ հաղթել է ընկերությունն ու իրավապահ կառույցների մարզական ընկերության մշակույթ ձևավորելու պատրաստակամությունը։
Ոստիկանության օրվան նվիրված՝ «Դինամո» մարզական-հասարակական կազմակերպության նախաձեռնությամբ ապրիլի 8-ին մեկնարկել էր իրավապահ մարմինների 2025 թվականի ֆուտզալի առաջնությունը, որին մասնակցում են Ոստիկանության, Ազգային անվտանգության ծառայության, Քննչական կոմիտեի, Հակակոռուպցիոն կոմիտեի, Գլխավոր դատախազության, Արդարադատության նախարարության, Պետական վերահսկողական ծառայության և Պետական եկամուտների կոմիտեի հավաքական թիմերը։
Առաջնության նպատակն է եղել իրավապահ կառույցների միջև ձևավորել մարզական առողջ փոխհարաբերություններ։
«Շնորհավորում ենք մեր գործընկերներին՝ ՀՀ գլխավոր դատախազության և ՀՀ քննչական կոմիտեի հավաքական թիմերին՝ պատվավոր 2-րդ և 3-րդ հորիզոնականները զբաղեցնելու առթիվ և շնորհակալություն ենք հայտնում իրավապահ մյուս գործընկեր կառույցներին՝ ակտիվ մասնակցության համար»,- ասվում է ՆԳՆ հաղորդագրության մեջ:
