Ինչի՞ դիմաց է պետությունը «ԷՅ-Ի-ՋԻ-ՍԵՐՎԻՍ » ՍՊԸ-ին վճարել ահռելի գումարներ
Հայաստանում գազի ներտնային սպասարկման ոլորտում կոռուպցիոն ռիսկերը և չարաշահումները բացահայտելու նպատակով Lragrogh.com-որոշեց հետաքննություն անցկացնել տարբեր պետական հիմնարկներում: Մեր այցելած հիմնարկներից մանկապարտեզների տնօրենները, հիմնականում խուսափեցին պատասխանել «ԷՅ-Ի-ՋԻ-ՍԵՐՎԻՍ» ՍՊԸ-ի գործունեությանը վերաբերող հարցերին, թեև նրանցից ոմանք նախկինում պայմանագրեր էին կնքել այդ ընկերության հետ: Նրանք մեզ խորհուրդ տվեցին բոլոր հարցերի պատասխանները ստանալ տվյալ վարչական շրջանի ղեկավարությունից:
Մենք փորձեցինք նախևառաջ համացանցի միջոցով ծանոթանալ, թե ինչ գործունեություն է իրականացրել «ԷՅ-Ի-ՋԻ-ՍԵՐՎԻՍ » ՍՊԸ-ն, որն է նրա ՕԳԳ-ն:
Պարզվում է, որ «ԷՅ-Ի-ՋԻ-ՍԵՐՎԻՍ » ՍՊԸ-ն ստեղծվել է 2007թ., նրա գործունեությունը, ըստ շրջանառվող լուրերի, կապվում է ՀՀ նախկին վարչապետ Կարեն Կարապետյանի հետ, որը 2001-2010թթ. եղել է «ՀայՌուսգազարդ » (ներկայիս «Գազպրոմ Արմենիա» ՓԲԸ ) վարչության նախագահ, գլխավոր տնօրեն: ՍՊԸ-ն գործում է ՀՀ ողջ տարածքում, ունի 15 տարածք և նրանց կազմում 38 տեղամասային ծառայություններ, որոնք սպասարկում են 723 հազար բնակիչ-բաժանորդների և մոտ 6000 բաժանորդ-կազմակերպությունների: ՍՊԸ-ն սպասարկում է նաև բնական գազը կենցաղային նպատակով օգտագործող հասարակական օբյեկտներին: Համաձայն «ԷՅ-Ի-ՋԻ-ՍԵՐՎԻՍ » ՍՊԸ կայքի` իր և «ՀայՌուսգազարդ » ՓԲԸ-ի (ներկայիս «Գազպրոմ Արմենիա » ՓԲԸ ) միջև 02.07.2007թ. կնքվել է «Հանձնարարության պայմանագիր»: Սակայն որևէ տեղ այդ պայմանագիրը հրապարակված չէ, ինչպես նաև հրապարակված չեն «ԷՅ-Ի-ՋԻ-ՍԵՐՎԻՍ » ՍՊԸ-ի ընտրության վերաբերյալ ընթացակարգի փաստաթղթերը, համապատասխան որոշումը և սպասարկող անձի ընտրության չափորոշիչները: ՍՊԸ-ն ընտրվել է առանց որևէ հրապարակային մրցույթի:
Ըստ «Հայկական ժամանակ » օրաթերթի 30.09.2019թ. հրապարակման` «Գազպրոմ-Արմենիա »-ն արդեն տևական ժամանակ խոչընդոտում է գազի ներտնային սպասարկում իրականացնող «Էկոնոմգազ Սերվիս » ՍՊԸ-ի աշխատանքին` նրանց հետ պայմանագիր կնքող բաժանորդների գազն անջատելով: Այդ մասին «ՀԺ »-ին ասել է «Էկոնոմգազ Սերվիս » ընկերության հիմնադիր-տնօրեն Դանիել Զաքարյանը: 2004-2006թթ. Զաքարյանին էր պատկանում «Աշլիդ » ՍՊԸ-ն, որը Երեւանում ներտնային գազամատակարարում էր իրականացնում: Նրա խոսքով` մենաշնորհի պատճառով այդ ոլորտը տրվեց «ԷՅ-Ի-ՋԻ-ՍԵՐՎԻՍ » ՍՊԸ-ին, իսկ իր ընկերությունը դուրս մղվեց շուկայից:
Հանրային ծառայությունները կարգավորող հանձնաժողովի որոշմամբ`2007թ. նոյեմբերից գազի ներտնային ցանցի սպասարկումը հանձնվեց «ՀայՌուսգազարդ»-ին (այժմ`«Գազպրոմ Արմենիա »): Իսկ «ՀայՌուսգազարդ »-ը ստեղծեց նոր ընկերություն և այդ դաշտը հանձնեց «ԷՅ-Ի-ՋԻ- ՍԵՐՎԻՍ » ՍՊԸ-ին: Նույն հրապարակման մեջ Դանիել Զաքարյանը նշել է, որ մարզերում շատ մարդիկ են իրենց հետ պայմանագիր կնքել` մոտ 20 հազար բաժանորդ ունեն, սակայն «Գազպրոմ Արմենիա »-ն խոչընդոտում է իրենց աշխատանքը:
«Հետք » պարբերականի ««Գազպրոմ Արմենիա »-ն ապօրինի պարտականություններ է դրել հսկիչների վրա» (19.05.2016թ.) հրապարակման համաձայն`«Գազպրոմ Արմենիա » ՓԲԸ-ի նախկին աշխատակից , հսկիչ Գայանե Կիրակոսյանին ստիպել են թողնել աշխատանքը` պատճառաբանելով, որ վատ է կատարում մի շարք գործողություններ, որոնք, սակայն, իր պարտականությունների մեջ չեն մտնում:
«Ինձ 334 հատ գազի ներտնային խախտումների արձանագրություն են տվել, որոնցից 33-ի թերությունները վերացրած հանձնել եմ իրենց, բայց ներտնային ծառայություններ մատուցելն ու թերություն վերացնելն իմ պարտականությունների մեջ չի մտնում: Այն, ինչում մեղադրում են, թե թերացել եմ, իմ աշխատանքային պարտականությունների մեջ չի մտնում »,- ասել է Գայանեն:
Նույն պարբերականի «Մենաշնորհի պայքար. գազի սպասարկման աշխատակիցներն անջատել են բնակչի գազը այլ սպասարկողի ընտրելու համար» (22.08.2018թ.) հրապարակման մեջ նշվում է, որ ներտնային գազասպասարկում իրականացնող «ԷՅ-Ի-ՋԻ-ՍԵՐՎԻՍ » ՍՊԸ-ի աշխատակիցներն օրերս անջատել են Սեւանի բնակիչ, 69-ամյա Անահիտ Սարգսյանի տան գազամատակարարումը: Բնակչուհին, սակայն, ո՛չ գազի, ո՛չ էլ սպասարկման համար գանձվող պարտք չի ունեցել: Ավելին` 1250 դրամ կանխավճար է ունեցել: Ընդամենը որոշել է խզել պայմանագիրը «ԷՅ-Ի-ՋԻ-ՍԵՐՎԻՍ » ՍՊԸ-ի հետ և նոր պայմանագիր կնքել «Էկոնոմգազ-սերվիս » ՍՊԸ-ի հետ, որը նույնպես իրականացնում է գազամատակարարման ծառայություններ:
20.06.2020թ. ճգնաժամային կառավարման ազգային կենտրոն ահազանգ է ստացվել, որ Երևանի Կորյունի և Նալբանդյան փողոցների խաչմերուկում` ոստիկանության վարչության շենքի տանիքից ծուխ է նկատվում: Պարզվել է, որ Նալբանդյան փողոցի թիվ 130 հասցեում`ՀՀ ոստիկանության շենքի խոհանոցի ծխատարում, ծխացել է յուղի նստվածք, որն էլ թողել է հրդեհի տպավորություն:
Իսկ օրեր առաջ էլ` ապրիլի 23-ին, ժամը 13.20-ի սահմաններում, ՀՀ Ներքին գործերի նախարարության փրկարար ծառայության 911 ճգնաժամային կառավարման ազգային կենտրոն ահազանգ է ստացվել, որ Արշակունյաց պողոտայի թիվ 11/1 հասցեում գործող «ՍԱՍ » ֆուդ-կորտի տարածքում ծուխ է նկատվում: Պարզվել է`այրվել են ծխատար խողովակի մեջ կուտակված յուղային շերտը և վառարանում կերակուրը:
Ըստ մամուլի հրապարակումների` դեռևս 2019թ. կառավարությունում քննարկվել էր, որ գազի ներտնային սպասարկումն իրականացնի ԱԻՆ-ը, իսկ մասնավոր «ԷՅ-Ի-ՋԻ-ՍԵՐՎԻՍ » ընկերությունը փակվի: Վարչապետը հանձնարարել էր Պետական վերահսկողական ծառայությանը ստուգումներ սկսել, իսկ Հանրային ծառայությունները կարգավորող հանձնաժողովում`քննարկումներ անցկացնել ներտնային սպասարկման վերաբերյալ:
Lragrogh.com-ը ս.թ. ապրիլի 19-ին այցելեց «ԷՅ-Ի-ՋԻ-ՍԵՐՎԻՍ » ՍՊԸ ՝ ընկերության տնօրեն Արման Նալբանդյանից որոշակի հարցերին պարզաբանում ստանալու նպատակով , մասնավորապես հարցերի մեջ ներառված էր, թե արդյո՞ք ղեկավարությունը տեղյակ է իր աշխատակից, բաժանորդների սպասարկման պետ Վահագն Դավթի Բաղդասարյանը ունի սեփական «Հրշեջ անվտանգության մասնագիտացված ծառայություն » ՍՊ ընկերությունը և զբաղվում է ձեռնարկատիրական գործունեությամ ըստ էության կատարելով այն գործառույթը որն իրականացնում նաև «ԷՅ-Ի-ՋԻ-ՍԵՐՎԻՍ » -ը , և այդ կերպ կարող է «ԷՅ-Ի-ՋԻ-ՍԵՐՎԻՍ » ՍՊԸ-ի բարի համբավը կարող է օգտագործել իր սեփական բիզնեսի համար, ինչն էլ ստվեր է գցում «ԷՅ-Ի-ՋԻ-ՍԵՐՎԻՍ » ՍՊԸ-ի գործունեության վրա: Հարցադրումների մեջ ներառված էր նաև ընկերությունների միջև փոխկապակցվածության առկայությանը, որպես ստվերային հովանավոր:
Ս.թ. ապրիլի 20-ին առ AEb 01/02/ 218 գրությամբ` «ԷՅ-Ի-ՋԻ-ՍԵՐՎԻՍ » ՍՊԸ-ից ստացանք հետևյալ պատասխանը. «ՀՀ ցանկացած քաղաքացի, այդ թվում` մեր ՍՊԸ-ի աշխատակից Վահագն Դավթի Բաղդասարյանը, ՀՀ օրենսդրությամբ սահմանված կարգով իրավունք ունի զբաղվելու ձեռնարկատիրական գործունեությամբ`բացառությամբ օրենքով արգելված դեպքերի: Ես, որպես «ԷՅ-Ի-ՋԻ-ՍԵՐՎԻՍ » ՍՊԸ-ի գլխավոր տնօրեն, իրավունք չունեմ արգելելու կամ խոչընդոտելու Վահագն Բաղդասարյանի ձեռնարկատիրական գործունեությունը, առավել ևս, որ այդ գործունեությունը որևէ ձևով չի առնչվում ո՛չ «ԷՅ-Ի-ՋԻ-ՍԵՐՎԻՍ » ՍՊԸ-ի, ո՛չ էլ «Գազպրոմ Արմենիա » ՓԲԸ-ի գործունեությանը: Որքանով որ ես տեղյակ եմ`«Հրշեջ անվտանգության մասնագիտացված ծառայություն » ՍՊԸ-ից բացի նմանատիպ ձեռնարկատիրական գործունեությամբ զբաղվում են բազմաթիվ այլ ընկերություններ:
- Ինչ վերաբերում է Ձեր կողմից մատնանշված «ԷՅ-Ի-ՋԻ-ՍԵՐՎԻՍ » ՍՊԸ-ի գործարար համբավին և Վահագն Բաղդասարյանի կողմից պաշտոնեական դիրքի օգտագործմանը, մեկ անգամ ևս վստահեցնում եմ, որ Ձեր կողմից մատնանշված հանգամանքը որևէ ձեւով չի առնչվում մեր ընկերության կողմից իրականացվող գործունեությանը: Միաժամանակ տեղեկացնում եմ, որ մեր ընկերության գործարար համբավը պայմանավորված է միայն ընկերության կողմից ստանձնած պարտավորությունների կատարմամբ:
- Ինչ վերաբերում է իմ կողմից անձնական շահ հետապնդելուն, շահագրգիռ կողմ և ստվերային հովանավոր հանդիսանալուն, ապա դա նվազագույնը կոռեկտ չէ, ինչը պարունակում է մեր ընկերության գործարար համբավը և իմ անունը արատավորելու երանգներ»:
Փաստացի ուսումնասիրությամբ պարզեցինք, որ երկու կազմակերպությունները միաժամանակ կատարում են նույն գործունեությունը, ընդ որում նույն հիմնարկին նույն ժամանակահատվածում մատուցում են նույն ծառայությունը, որպես վառ օրինակ՝ «ԷՅ-Ի-ՋԻ-ՍԵՐՎԻՍ » ՍՊԸ-ի կողմից հարկադիր կատարումն ապահովող ծառայության Իջևանի մասնաճյուղում, Երիտասարդական 1 հասցեում 20.02.2023թ. կնքված թիվ կ 11-0546 պայմանագրի 1-2 կետի բ. ենթակետի համաձայն` ընկերությունն իրականացնում է գազասարքերի ծխատար խողովակների հավաքակցում, ծխատար ուղղուն միացում, օդափոխությանը և այրմանն անհրաժեշտ օդաքանակի ներուժի համար նախատեսված բացվածքների զննում, ծխաօդատար ուղիների քաշի ստուգում: Նշված պայմանագիրը, համաձայն նույն պայմանագրի 1.4 կետի` կնքվել է երեք տարի ժամկետով, և, համաձայն պայմանագրի անբաժանելի մաս համարվող թիվ 1 հավելվածի` գազասպառման ամիսները 5.1-ում նշվել են հունվար, փետրվար, մարտ, ապրիլ, նոյեմբեր, դեկտեմբեր ամիսները:
Մյուս ընկերությունը՝ «Հրշեջ անվտանգության մասնագիտացված ծառայություն » ՍՊԸ-ն Հարկադիր կատարումն ապահովող ծառայության հետ 09.11.2022թ. կնքել է թիվ 6819122 պայմանագիր , որում 1.2 կետի ա. ենթակետի համաձայն`ՀՀ կառավարության 2005թ. դեկտեմբերի 22-ի թիվ 2399-Ն որոշմամբ հաստատված անվտանգության կանոնները գազի տնտեսությունում տեխնիկական կանոնակարգով նախատեսված աշխատանքները պարբերաբար իրականացվում են ծխաօդատար ուղիների սեփականատիրոջ միջոցների հաշվին:
Այս պայմանագրի ժամկետը համաձայն նույն պայմանագրի 1.3 կետի` մեկ տարի է, կնքման պահից:
Այսինքն երկու ընկերությունները նույն գործառույթն իրականացնելու համար կնքել են նույն Պատվիրատուի հետ պայմանագիր, այն պարագայում երբ նախորդ պայմանագիրը դեռ գործողության մեջ է և երկու անգամ Պատվիրատու պետական կառույցը պետբյուջեից վճարել է կրկնակի վճար:
Ավելին՝
«Հրշեջ անվտանգության մասնագիտացված ծառայություն » ՍՊԸ-ն Երևանի թիվ 106 և թիվ 107 մանկապարտեզների հետ ս.թ. մարտի 27-ին կնքել է պայմանագիր, ըստ որի` տրամադրվել է հանձնման-ընդունման արձանագրություն, կատարման ժամկետ է նշված 27.03.2023թ., իսկ փաստացի վճարման ժամկետը` 2023թ. սեպտեմբերը:
Այդ ընթացքում Երեւանի թիվ 106 մանկապարտեզ ՀՈԱԿ-ին 11.09.2023 թվականից մինչեւ 2024թ. տրամադրվել է տեխնիկական վիճակի մասին թիվ N006946 ակտը, որում հստակ նշված է տեխնիկական վիճակի սարքին, ինչպես նաև` մաքուր լինելու փաստը, այսինքն դեռ 2023 թվականի սեպտեմբեր ամիսը չեկած տրամադրվել է ակտ սեպտեմբերին ստուգում անցկացնելու և տեխնիկական վիճակի մասին: Մեկ այլ դրվագ՝ Երեւանի թիվ 107 մանկապարտեզ ՀՈԱԿ-ին տրամադրվել է նույնաբովանդակ թիվ N006945 ակտը՝՝ Երեւանի թիվ 111 մանկապարտեզ ՀՈԱԿ-ին կրկին տրամադրվել է նույնաբովանդակ թիվ N006941 ակտը կրկին ապագայի համար: Մեկ ուրիշ դրվագում՝ Երեւանի թիվ 113 մանկապարտեզ ՀՈԱԿ-ին ևս 11.09.2023 թվականից մինչեւ 2024թ. տրամադրվել է տեխնիկական վիճակի մասին թիվ N006939 ակտը և այսպես շարունակ կարելի է թվել:
Կրկին ընդգծենք կարևոր հանգամանք հանդիսացող այն փաստը , որ տեխնիկական վիճակի մասին ակտերը որոնցում հստակ նշված են տեխնիկական վիճակի սարքին, ինչպես նաեւ` մաքուր լինելու փաստը տրամադրել են ապագայի համար ,որ իբր ստուգվել և տրվել է 11.09.2023 թվականին, և ուժի մեջ է մինչև 11.09. 2024 թվականը, բայց ֆիքսենք այն փաստը, որ մենք այդ ակտերը արձանագրել ենք 19.04.2023 թվականին: Ինչպե՞ս հասկանանք՝ դեռ սեպտեմբեր ամիսը չեկած տրամադրվել է ակտ այդ ժամանակահատվածի համար մաքրված և սպասարկված լինելու մասին: Եվ սա ընդամենը մի քանի դրվագ է, կարծում ենք՝ էլի կլինեն նմանատիպ դեպքեր …. Միգուցե սա փաստաթղթի կեղծի՞ք է:
Հաշվի առնելով վերոգրյալը`կարելի է եզրակացնել, որ կազմակերպությունը տրամադրում է ակտեր ապագայի համար, փաստացի չիրականացնելով որևէ ծառայություն, չկատարելով որևէ աշխատանք տրամադրում է կեղծ ոչ իրական տեղեկություններ պարունակող փաստաթղթեր, իսկ նման անպատասխանատու վարքի պատճառով կարող են տեղի ունենալ դժբախտ պատահարներ, առավել ևս` մանկապարտեզներում, դպրոցներում որտեղ հաճախում են անպաշտպան երեխաներ: Մեր տեղեկություններով`«Գազպրոմ Արմենիա » ՓԲԸ-ն և «ԷՅ-Ի-ՋԻ-ՍԵՐՎԻՍ » ՍՊԸ-ն պատասխանատվություն չեն կրում «Հրշեջ անվտանգության մասնագիտացված ծառայություն » ՍՊԸ-ի և նմանատիպ այլ կազմակերպությունների կողմից տրամադրված ակտերի համար:
Ուշագրավ է նաև այն փաստը, որ հիշեցնենք Կարեն Կարապետյանը որպես Երեւանի քաղաքապետ պաշտոնավարել է 17.12.2010թ. մինջը 28.10.2011թվականներին և Երևանի քաղաքապետարանի բյուջեից 2011թ․ «ԷՅ-Ի-ՋԻ-ՍԵՐՎԻՍ» ՍՊԸ-ին փոխանցվել է 210. 987. 600 (երկու հարյուր տասը միլիոն ինը հարյուր ութանասունյոթ հազար վեց հարյուր) ՀՀ դրամ գումար։ Ըստ շրջանառվող լուրերի՝ «ԷՅ-Ի-ՋԻ-ՍԵՐՎԻՍ» ՍՊԸ-ն պատկանում է Կարեն Կարապետյանին։
Իսկ ահա «Հրշեջ անվտանգության մասնագիտացված ծառայություն » ՍՊԸ-ին պետությունից փոխանցվել է 65.594.380 (վաթսունհինգ միլիոն հինգ հարյուր իննսունչորս հազար երեք հարյուր ութանասուն) ՀՀ դրամ գումար:
Ստույգ տվյալներով` պետությունը մինչ օրս «ԷՅ-Ի-ՋԻ-ՍԵՐՎԻՍ » ՍՊԸ-ին մատուցած ծառայությունների դիմաց վճարել է 835, 359, 844 (ութ հարյուր երեսուն միլիոն երեք հարյուր հիսունինը հազար ութ հարյուր քառասունչորս) ՀՀ դրամ գումար մինչդեռ, մեր կարծիքով, այդ ծառայությունը կարող էր վերապահվել պետական որևէ գերատեսչության, օրինակ` այդ նույն ծառայությունները կարող էր մատուցել ՀՀ արտակարգ իրավիճակների նախարարության «Տեխնիկական անվտանգության ազգային կենտրոն» ՊՈԱԿ-ը, և վճարված բավական մեծ այդ գումարները կարող էին ուղղվել առավել առաջնային օղակների՝ օրինակ բանակի ֆինանսավորմանը այլ ոչ վերը նշավ երկու ընկերություններին: ,
Երևանի քաղաքապետարանի ամբողջ գործունեության պատմության մեջ ամենախոշոր դրամական փոխանցումը «ԷՅ-Ի-ՋԻ-ՍԵՐՎԻՍ » ՍՊԸ-ին կատարվել է 2011 թվականի ընթացքում՝ Կարեն Կարապետյանի պաշտոնավարման ընթացքում:
Ֆիքսենք որ այս տարիների ընթացքում վերը նշված երկու ընկերություններին պետական բյուջեից ընդհանուր վճարվել է 900.954.224 (ինը հարյուր միիոն ինը հարյուր հիսունչորս հազար երկու հարյուր քսանչորս ) ՀՀ դրամ գումար:
Սա՛ է նախկին ռեժիմի դեմքը……
Նախկին, ինչպես նաև ներկա իշխանությունների օրոք, ՀՀ կառավարության կողմից ընդունված ներքոնշյալ որոշումների կետերի համաձայն՝ ԲԲՇ-ներում չգտնվող կազմակերպությունների գազասարքավորումների անվտանգ շահագործման պատասխանատվությունը կրում է տվյալ կազմակերպության ղեկավարը, որն իր կազմակերպության ուժերով կամ տվյալ ոլորտում լիցենզավորված ցանկացած կազմակերպության հետ պայմանագրային հիմունքներով պետք է կազմակերպի տվյալ աշխատանքները: Այդպիսի լիցենզավորված կազմակերպությունների թվին է պատկանում նաև ՀՀ արտակարգ իրավիճակների նախարարության «Տեխնիկական անվտանգության ազգային կենտրոն» ՊՈԱԿ-ը:՝
- 2005 թվականի դեկտեմբերի 22-ի «Անվտանգության կանոնները գազի տնտեսությունում» տեխնիկական կանոնակարգը հաստատելու մասին N 2399-Ն որոշման II. ԸՆԴՀԱՆՈՒՐ ԴՐՈՒՅԹՆԵՐ բաժնի 12) կետի համաձայն՝
12) Գազասպառման համակարգերի շահագործման ընթացքում անվտանգության ապահովումը վերապահվում է դրանց սեփականատեր հանդիսացող կազմակերպություններին: Բացառություն են կազմում բնակելի շենքերի բնակարանների, բնակելի շենքերում տեղակայված կազմակերպությունների և առանձնատների ներտնային գազասպառման համակարգերը, որոնց շահագործման ընթացքում անվտանգությունը ապահովվում է գազամատակարարող կազմակերպության կողմից: Գազամատակարարման ցանցի և գազասպառման համակարգերի շինմոնտաժային աշխատանքների որակի ապահովումը վերապահվում է գազիֆիկացման աշխատանքները իրականացնող կազմակերպություններին: Կազմակերպությունների ղեկավարները պարտավոր են կազմակերպել և անցկացնել գազի տնտեսության վիճակի վերահսկողություն և հետևել գազատարերի, սարքավորումների և գազօգտագործող ագրեգատների շինարարության /մոնտաժի/ և շահագործման կանոնների, նորմերի և հրահանգների պատշաճ կատարմանը, ինչպես նաև ՀՀ կառավարության 1998թ. նոյեմբերի 11-ի թիվ 702 որոշման համաձայն կազմեն և հաստատեն արդյունաբերական օբյեկտների անվտանգության վկայագիրը:
- 2023 թվականի ապրիլի 13-ի «Գազաբաշխման համակարգի անվտանգության և շահագործման կանոնները հաստատելու մասին»” N-539-Ն ընդունված որոշման 12 կետի՝
- Գազասպառման համակարգերի շահագործման ընթացքում անվտանգության ապահովումը վերապահվում է դրանց սեփականատեր հանդիսացող կազմակերպություններին: Բացառություն են կազմում բնակելի շենքերի բնակարանների, բնակելի շենքերում տեղակայված կազմակերպությունների և առանձնատների ներտնային գազասպառման համակարգերը, որոնց շահագործման ընթացքում անվտանգությունը ապահովվում է գազամատակարարող կազմակերպության կողմից: Գազամատակարարման ցանցի և գազասպառման համակարգերի շինմոնտաժային աշխատանքների որակի ապահովումը վերապահվում է գազիֆիկացման աշխատանքները իրականացնող կազմակերպություններին:
Կազմակերպությունների ղեկավարները պարտավոր են կազմակերպել և անցկացնել ԳՏ վիճակի վերահսկողություն և հետևել գազատարների, սարքավորումների և գազօգտագործող ագրեգատների հավաքակցմանը և շահագործման կանոնների, նորմերի և հրահանգների պատշաճ կատարմանը:
Հարց քաղաքացիներին: Ի՞նչ եք կարծում` վերոնշյալ ոլորտում առկա՞ են, արդյոք, կոռուպցիոն ռիսկեր, ներկա իշխանությունների օրոք գործո՞ւմ են հովանավորչական սխեմաներ, ինչպես` նախկինում:
Սույն լրագրողական հետաքննությանը աջակցություն ցուցաբերելու համար մեր խորհին շնորհակալությունն ենք հայտնում Երևանի քաղաքապետարանի աշխատակազմին, ինչպես նաև՝ ՀՀ ֆինանսների նախարարության և ՀՀ պետական եկամուտների կոմիտեի աշխատակազմերին:
http://lragrogh.info/?p=28492&fbclid=IwAR0Lei77SbltRV8BE8GlMQPKSWwZCPuio0mHUUx96u3_2v-bpBDNLfPmvHU
