Վերջին օրերին Բաքվից հնչող հայտարարությունները համարում եմ լրջագույն հարված խաղաղության գործընթացին։
Այս մասին հայտարարել է վարչապետ Նիկոլ Փաշինյանը՝ Գավառում տեղի ունեցած «Քաղաքացիական պայմանագիր» կուսակցության նախաձեռնող խմբի նիստի ընթացքում։
«Մենք մի քանի անգամ հայտարարել են, որ Հայաստանի և Ադրբեջանի միջև խաղաղությունը, ինչպես նաև սահմանների դելիմիտացիան և դեմարկացիան պետք է հիմնված լինի 1991 թվականի դեկտեմբերի Ալմա-Աթայի հռչակագրի վրա: Սան նշանակում է, որ Հայաստանի Հանրապետությունը և Ադրբեջանը միմյանց տարածքային ամբողջականությունը ճանաչում են այն ըմբռնմամբ, որ ՀՀ տարածքը ճշգրիտ այնքան է, որքան եղել է Հայկական սովետական սոցիալիստական հանրապետությունը, նույնը Ադրբեջանինը:
Սա նաև նշանակում է, որ սահմանազատման գործընթացը սահման ստեղծելու մասին չէ, այսինքն` մեր դելիմիտացիայի հանձնաժողովները, ոչ թե պետք է գնան սահման ստեղծեն, այլ պետք է վերաարտադրեն այն սահմանները, որոնք գոյություն են ունեցել 1991 թվականին»,- ասել է վարչապետը:
Փաշինյանն ընդգծել է, որ ի հեճուկս ձեռք բերված պայմանավորվածություններին Ադրբեջանը փորձում է տարածքային պահանջներ գեներացնել Հայաստանի Հանրապետության նկատմամբ, ինչը բացարձակապես անընդունելի է։
«Փորձ է արվում ժամանակ առ ժամանակ միջանցքային խոսույթ ձևավորել Հայաստանի տարածքի նկատմամբ։ Ընդ որում, երբ մենք ասում ենք, որ դա նկրտում է ՀՀ տարածքային ամբողջականության նկատմամբ, մեզ ասում են, որ դա միջազգայնորեն ընդունված խոսույթ է, կա Հյուսիս-հարավ միջանցք և այլն»,- ասաց նա։
Նա նշեց՝ որպեսզի այս բառային խաղերից դուրս գանք, մենք այսում ենք՝ ինչ պայմանով Իրանի Իսլամական Հանրապետությունը տրամադրում է կապ Նախիջևանի և Ադրբեջանի մյուս հատվածի միջև, նույն պայմաններով մենք էլ ենք պատրաստ տրամադրել այդ կապը:
