Եվրասիական տնտեսական միությանը (ԵԱՏՄ) մասնակցությունը դրա անդամ երկրներին տալիս է համախառն ներքին արդյունքի (ՀՆԱ) նկատելի աճ։
Այս մասին ասել է ՌԴ նախագահի մամուլի քարտուղար Դմիտրի Պեսկովը՝ պատասխանելով լրագրողների հարցին, թե արդյո՞ք Կրեմլն ակնկալում է, որ Հայաստանը կարող է դադարեցնել իր մասնակցությունը ԵԱՏՄ-ին։
Նա ընդգծել է, որ «կառույցի բոլոր մասնակից երկրների շահերից է բխում շարունակել զարգացնել ԵԱՏՄ-ն»։
«Ընդհանուր առմամբ, Եվրասիական տնտեսական միության շրջանակներում ինտեգրացիոն գործընթացն ինքնին շատ հաջող է մասնակից երկրների համար: Մասնակից երկրները դա գիտեն, և, ամենայն հավանականությամբ, այս ինտեգրացիոն գործընթացի մասնաբաժինը ԵԱՏՄ երկրների ՀՆԱ-ի տարեկան աճի տեմպերում շատ ու շատ նկատելի է»,- ընդգծել է Կրեմլի ներկայացուցիչը։
Այսօր սպասվում է Եվրասիական տնտեսական միության բարձրագույն խորհրդի նիստը, որը նախագահելու է ՀՀ վարչապետ Նիկոլ Փաշինյանը:
Հիշեցնենք՝ այդ նպատակով վարչապետ Նիկոլ Փաշինյանն աշխատանքային այցով մեկնել է Ռուսաստանի Դաշնություն։
Նախատեսվում է նաև ՀՀ վարչապետի և ՌԴ նախագահի հանդիպումը:
