Հորդանանի առնվազն 14 քաղաքացի է մահացել Սաուդյան Արաբիայում Հաջի ուխտագնացության ժամանակ ծայրահեղ շոգի պատճառով։ Ակնկալվում է, որ իսլամական աշխարհի կարևորագույն սրբավայրերից մեկում զանգվածային ուխտագնացության ժամանակ զոհերի թիվը կարող է ավելի մեծանալ։
Հորդանանի արտաքին գործերի նախարարության տվյալներով՝ երկրի 14 քաղաքացի մահացել է «ծայրահեղ շոգից առաջացած արևահարությունից», ևս 17-ը համարվում են անհետ կորած, նրանց որոնումները շարունակվում են։
Նախարարությունը հայտարարության մեջ նշել է, որ Սաուդյան Արաբիայի իշխանությունների հետ համաձայնեցնում է զոհերի մարմինները թաղելու կամ տեղափոխելու ընթացակարգերը՝ նրանց ընտանիքների ցանկությանը համապատասխան:
Միաժամանակ, Իրանի Կարմիր մահիկը հաստատել է հինգ իրանցի ուխտավորների մահը, սակայն չի հստակեցրել, թե ինչպես են նրանք մահացել։
Հաջը` կրոնական ծեսը, որը պարտադիր է բոլոր մուսուլմանների համար, աշխարհի ամենամեծ հասարակական հավաքներից մեկն է: Այն իսլամի հինգ սյուներից մեկն է՝ հինգ ամենօրյա աղոթքների, տարեկան ծոմապահության, բարեգործության, Ալլահի և Մուհամմեդի՝ որպես նրա մարգարեի հանդեպ հավատքի հետ մեկտեղ:
Այս տարի Սաուդյան Արաբիայի պաշտոնյաները հայտնել են, որ ուխտագնացությանը կմասնակցի ավելի քան 1,8 միլիոն մարդ:
Հաջի ժամանակ զանգվածային զոհերի հետ կապված աղետները, ներառյալ հրմշտոցները և վրաններում բռնկված հրդեհները, սովորական են: Բայց ամենից հաճախ հիմնական խնդիրը ծայրահեղ շոգն է։
Այս շաբաթ օդի ջերմաստիճանը գերազանցել է 46 աստիճանը, ինչը դժվարացնում է բացօթյա և ոտքով կատարվող բազմաթիվ ծեսերը, հատկապես տարեց մարդկանց համար։
«Այս տարվա Հաջը սպասվում է Մեքքայում և Մեդինայում սովորականից բարձր ջերմաստիճանի տակ: Միջին ջերմաստիճանի բարձրացումը կկազմի 1,5-2 աստիճան»,- անցած շաբաթ զգուշացրել է Սաուդյան Արաբիայի ազգային օդերևութաբանական կենտրոնի ղեկավար Այման Ղուլամը։
Հնգօրյա ուխտագնացության կենտրոնում են հենց Մեքքան և Մեդինան։
Ըստ Սաուդյան Արաբիայի պաշտոնական գործակալության՝ Արաֆաթ լեռան բուժման կենտրոնում մինչ այժմ գրանցվել է ջերմային հարվածի 225 դեպք:
Ուխտագնացությունն ավարտվում է չորեքշաբթի։ Սաուդյան Արաբիայի իշխանությունները հայտարարել են, որ շոգի հետևանքները նվազեցնելու միջոցառումների շրջանակներում ստեղծել են բազմաթիվ կլիմայական վերահսկվող գոտիներ: Նրանք ջուր են բաժանում ու խորհուրդներ տալիս ուխտավորներին, թե ինչպես պաշտպանվել արևից ու շոգից։
Սաուդյան Արաբիայի Առողջապահության նախարարությունը նաև խորհուրդ է տվել ուխտավորներին հաճախակի ջուր խմել և խուսափել դրսում օրվա ամենաշոգ ժամերին՝ առավոտյան 10:00-ից 16:00-ն գտնվելուց:
Անցյալ տարի Հաջի ժամանակ զոհվել է առնվազն 240 մարդ։ Հաջի ժամանակ ամենասարսափելի աղետում՝ 2015 թվականին տեղի ունեցած մահացու հրմշտոցի ժամանակ, ավելի քան 2000 ուխտավոր է մահացել:
