Երգչուհի Սիպիլը Ստամբուլի <Հրանտ Դինք> դպրոցի հայ աշակերտների հետ գրել է նոր երգ, որը կոչվում է <Բարի լույս>: Երգի տեսահոլովակը սփռվելու է սեպտեմբերի 13-ին, ուրբաթ օրը, Թուրքիայի ժամանակով ժամը 13.00-ին, Յոթուբյան ալիքով:
Ստամբուլի <Հրանտ Դինք> դպրոցում բազմաթիվ երեխաներ են սովորում, այդ դպրոցի սաները խոսում եւ երգում են հայերեն, այնտեղ դասավանդում են հայերեն:
<Բարի լույս>-ը ձայնագրել են Սիպիլը եւ Ստամբուլի <Հրանտ Դինք> դպրոցի մանկական երգչախումբը` <մաղթենք բարի լույս, թող բարին հաղթի> կարգախոսի ներքո: Այս երգը յուրօրինակ ուղերձ է համայն մարդկությանը եւ պատգամում է բարի լինել, բարությամբ հաղթել չարին: Երգի բառերի հեղինակն է Համո Սահյանը, երաժշտությունը գրել է Հրանտ Չիզմեչյանը, գործիքավորողն է Մաժակ Թոշիկյանը, բեմադրիչներն են Հարություն Գեւորգյանը եւ Սայաթ Տաղլյանը:
Ի.նչ են պատգամում Ստամբուլի <Հրանտ Դինք> դպրոցի հայ տղաներն այս երգի միջոցով:
Մայր բնությունը գեղեցիկ գույներ եւ բույրեր է պարգեւել մարդ արարածին` գետի շառաչը, երփներանգ ծաղիկների բուրմունքը, անտառի մեղմ խշշոցը, կապույտ երկինքը: Այնուհանդերձ, մարդիկ, տեղի տալով իրենց եսասիրությանը, կարծես հեռացել են իրենց կոչումից, փոխանակ տեսնելու եւ վայելելու բնության հրաշքները, դառնալու նրա մեկ մասնիկը, նրանք աշխարհի չորս կողմերում պատերազմներ են հրահրում: Մենք այդ պատերազմները մերժում ենք <բարի լույս>-ով, որովհետեւ ամեն օր, ամեն <բարի լույս> օրհնություն ու լավատեսություն է, հույս է` հաշտություն աղերսող մանուկների համար:
Ուրեմն, բարի լույս ամբողջ աշխարհին:
